Komîteya Zîndanan a PKK-PAJKî bi eşkerayîyêke 10 şorişgêrê ke qirkerdişê dewleta tirke yê vera Zîndanê Amedî de, 1996 de şehîd bîyê û 2 şorişgêrê ke seba şermezarkerdişê nê qirkerdişî bedenê xo dabî adirî ver, yad kerdî.
Eşkerayîye wina ya:
”Barbarîya ke dişmenî Zîndanê Amedî de kerdbî 24 serrî xo pey de verdayî. La ma no qirkerdiş xo vîr a nêkerd. 24ê êlule de zerrîya pêro tepişteyan û embazanê ma vêşena. Hukmatê faşîstî yê Ana-Yolî 1996 de vera Rayberê ma û têkoşînê ma hêrişî zêdînabî. 24ê êlula 1996î de zî Zîndanê Amedî de 10 embazê ma bi hawayêkê barbarî ameybî qetilkerdene. Bi asinan û çuyan bedenê embazanê ma ameybî parçekerdene. Nê qirkerdişî rîyê dewlete yo raştikên bi zelalî eşkera kerd. Embazanê ma vera na barbarîye erjê merdimatîye astêka berze de temsîl kerdî.
Coka 24ê êlule tarîxê ma yê xoverdayîşî de ganî hertim bêro ercnayene û yadkerdene.
Zîndanî seba têgêrayîşê ma kelaya xoverdayîşî ya la seba dewleta tirke ya faşîste kelaya îşkence û teslîmgirewtişê îradeyî ya. Dişmenî 1996 de kerd ke zîndanan de îradeyê şorişgêran teslîm bigêro û şorişgêran bikero îtîrafker. O çax Zîndanê Amedî coka bi cayêkê cigêrayîş û îşkenceyî. Vera şorişgêran na polîtîkaya dişmenî bi şîarê ‘Tîya Amed o, nêmaneno cayêkê bînî’ ameye pêşwazîkerdene. Bi nê hawayî dişmenî armanc kerd ke zerrîya şorişgêran de tersêkî virazo. Halbûkî seba ma Zîndanê Amedî nêmendêne cayêkê bînî. Zîndanê Amedî kelaya xoverdayîşî ya têgêrayîşê ma bi û cayê xoverdayîşê Mazlûm, Ferhat, Kemal Pîr, Sakîne Cansizan bi. Amed cayê Mehmet Aslan, Ridvan Bûlût, Nîmet Çakmak, Cemal Çan, Ahmet Çelîk, Kadîr Demîr, Edîp Dîrekçî, Sabrî Gumuş, Erkan Perîşan û Hakki Tekînan bi ke 24ê êlula 1996î de îrade, armanc û bawerîya înan ra ber çîyê înan çin bi ke xo ver bidê û xo bipawê.
O çax seba şermezarkerdişê na barbarîye Zîndanê Bayrampaşayî de embazanê ma Vedat Aydemîr û Hamdullah Şengurenî heman roje û saete de bedenê xo da adirî ver û şehîd bîyî. Bi nê hawayî 12 embazê ma xoverdayîşê vera barbarîya 24ê êlule de şehîd bîyî.
Ma 12 embazanê xo yê şehîdan bi rêz û minetî yad kenê. Ma soz danê ke armancanê înan bîyarê ca û qesasê înan bigêrê. Seba ke ma layîqê xoverdayîşê înan bibê xoverdayîşê Rayber Apoyî û zîndanan de şorê û nê xoverdayîşî xurt bikerê. Nê esasî ser o ma venga şarê ma yê welatperwerî, rayaumûmîya demokratîke danê ke vera tecrîdê serê Rayber Aoyî û zulmê serê zîndanan têbigêrê, xoverdayîşî pîl bikerê.”
