Komîteya Rayberdişî ya PKKyî bi eşkerayîyêke şexsê Hakî Karerî de pêro şehîdê Menga Gulane yad kerdî. Eşkerayîye wina ya:
”Embazê ma, lîdero pîl, şehîdê ma yo verên Hakî Karer 18ê gulana 1977î Antep de amebi şehîdkerdene. Ma serrgera 47ine ya şehadetê ci de yê. Ma sey Têgêrayîşê Azadîye Menga Şehîdan û Roja Şehîdan a 48ine de yê. Şehîdê ma her ca de û hertim benê çimeyê ma yê hêz û yewîye yo esas.
Ma serrgêra şehadetê ci de embaz Hakî Karerî û şexsê ey de pêro şehîdanê xo bi minet, heskerdiş û hûrmetî yad kenê. Ma seba serkêşîya ci ya Roja Şehîdan Rayber Apoyî bi hesrete û heskerdişî selam kenê. Ma soz danê ke serra 48ine ya şehîdan de xeta Apohîre û şehîdan de hîna zaf şer bikerê, Hemleya Azadîya Rayber Apoyî ser bivisnê.
Têkoşînê ma de bêguman şehîdî vernîya ma kenê roşnî. Şehîdê ma îsbatê raştî û serfîrazîya xeta Apogîre yê. O têgêrayîşo ke şehîdanê xo hol fam keno û wayîrê ci vejîyeno qetî do ser bikewo. Nê esasî ser o ma venga pêro şorişgêran, welatperweran, cinîyan, ciwanan û şarê ma danê ke raştîya şehîdan fam bikerê, xeta şehîdan de xo aver berê, yewîya xo bihêz bikerê û Hemleya ‘Abdullah Ocalanî rê Azadîye, Meseleya Kurdan rê Çareserîya Sîyasîye’ aver berê û bi nê hawayî vîrameyîşê şehîdanê ma vejîyê. 19ê gulane serrgêra şehadetê embaz Halîl Çavgunî û 17ê gulane zî serrgêra şehadetanê Ferhat Kurtay, Mahmut Zengîn, Eşref Anyik û Necmî Onerî ya. Ma pê bawer ê ke rayîrê nê şehîdan de ma do ser bikewê.
Şehîdê Hewlêrî ameyî yadkerdene
Înanê ke 26ê gulana 1997î de Qirkerdişê Hewlêrî kerdo, ê ewro seba îşxalî dewleta tirke rê rayîrî mojnenê. Bi na wesîle ma îşxalker û xayînan şermezar kenê, şexsê embazanê Hêlîne, Salîh û Ozanî de pêro şehîdanê xo yad kenê. Ancî ma şehîdanê gulane Mehmet Karasungur, Hozane Mizgîne, Şîrîne Elemhûlî, Azad Sîser, Kasim Engîn, Erdal, Andok û Êrîşî yad kenê. Ma pê bawer ê ke her roja gulane layîqê şehîdan derbaz bikero.
Wext wextê weriştişê topyekûnî yo
Serra Şehîdan a 48ine de Rayber Apo Îmrali de xo ver dano, gerîlayî xo ver danê, cinî û ciwanî û şarê ma xo ver danê. Ma şehîdan danê. Ma xeta şehîdan û Rayberîye de şinê. Ma hêrişanê îqtîdarê AKP-MHPyî yê faşîstî bi Şerê Şarî yê Şorişgêrî bi hawayêkê topyekûnî şiknenê.
Eşkera yo na serra 48ine de hêrişê tewr giranî vera Rayber Apoyî yenê kerdene. Bingeyê îtîfaqê TC-NATOyî de dewletê Neteweyanê Yewbîyayeyan bi sîstemê Îmraliyî konseptê qirkerdişê kurdan anê ca. 38 mengan ra nata Rayber Apoyî ra xeberêke nêna girewtene. Hinî qisey qedîya; wext wextê têkoşînî yo. Wext wedxtê weriştişê payan û çalakbîyayîşê toyekûnî yo. Çi bêro kerdene ganî ewro bêro kerdene. Çunke beno ke siba do erey bibo.
Sey PKKyî ma rewşe wina ercnenê û seba ney destê ma ra çi bêro ma do bikerê. Ma venga şarê xo, cinî û ciwanan û pêro dostanê xo danê ke vera dek û dolaban û tedayan têkoşînê seba azadîya Rayber Apoyî her ca de berz bikerê!
Ma bi kurdkî fikirîyayîş, qiseykerdiş, nuştiş, wendiş û ciwîyayîşî zaf manadar qebul kenê; qîmet danê xebatanê averberdişê kurdkî û her keso ke kede dano ney selam kenê. Ma veng danê ke xebatanê ziwanê kurdkî bi têkoşînê azadîye yê Kurdîstanî de ma yew bikerê.”
