Havînê hêzên PDK’ê ketibûn qada Zînî Wertê ya li herêma Qendîlê. Bi agahiyên ku ji aliyê PDK’ê ve hatin dayîn li Zînî Wertê 3 gerîla bi balafirên şer ên tirk şehîd hatibûn xistin. Di serî de xelkê başûrê Kurdistanê tevahiya gel û raya giştî ya Kurdistanê nerazîbûneke tund nîşanî vê yekê dabûn û li ser vê yekê tansiyona li Zînî Wertê hinekî kêm bûbû.
PDK’ê ji 25’ê cotmehê û pê ve jî hêzên ‘Leşkerî Gulan’ ku artêşeke taybet a Mesrûr Barzanî ye, bi wesayitên zirxî û çekên giran berê xwe dan Garê, Metîna û qadên cuda yên gerîla. Li gundên Deşta Nehlê ya li herêma Garê, li derdora nehiya Çemankê ev hêza navborî hatibû bicihkirin û li gel hişyariyên HPG’ê jî ketibûn nava qadên gerîla. Hêzên PDK’ê di 4’ê mijdarê de hîn bêhtir zêdegavî kir û li nehiya Çemankê li nêzî gundê Bêbadê bi rengê operasyonî êrîş birin ser kampên gerîla.
Ji ber zêdebûna rageşiyê Fermandariyên Biryargeha Navenda Parastina Gel banga diyalogê kiribûn û hişyarî dabûn. Lê belê PDK’ê bi hewldanên provokasyonê bersiv dabû van bangawaziyan. Vê carê jî li qadên Begova, Brîfka, Batûfa û Banka yên herêma Metînayê bendên kontrolê danîn û hewl dan ku hêzên gerîla li herêma Metînayê dorpêç bikin. Di 21’ê Mijdarê de jî hêzeke ji 300 kesî û 56 wesayîtên zirxî sewqî qada navbera Hecî Umran û Çomanê yên herêma Qendîlê kirin.
Bi vî rengî xwestin ku qadên gerîla gav bi gav dorpêç bike, zextê li ser xelkê herêmê bike, bi rêya ambargoyê nehêle ku gel pêwîstiyên xwe yên jiyanî tedarik bike û bi vî rengî neçar bihêlin ku xelk ji qadên gerîla koç bike.
Êrîş gihiştin asteke cuda
PDK’ê piştî van gavên dorpêçkirina qadên gerîla, êrîş û hewldanên xwe yên provokatîf gihand asteke cuda û sibeha 13’yê kanûnê li nêzî gundê Reşankê yê ser bi Zawiteyê wesayitek ku gerîla tê de bûn sekinandin, piştî ku dîtin ên di wesayîtê de gerîlayên HPG’ê ne bi rengekî dijwar gule li wesayitê barandin. Heman rojê saet di 20:30’î de li qada navbera gundên Kanê û Sergelê yên Amediyê jî bi wesayitên zirxî dor li wesayiteke gerîla pêçandin, dema ku wesayît ranewestiya û rêya xwe dewam kir gule lê reşandin û 3 gerîla bi giranî birîndar kirin. Xelkê herêmê ragihand ku di vê bûyerê de tu ji pêşmergeyên li gundên herêmê tev li êrîşê nebûne, yên ku êrîş kirine hêzên taybet ên ser bi PDK’ê bûn.
Navenda Ragihandin û Çapemeniyê ya HPG’ê bi daxuyaniyekê ragihand ku biryar hatiye dayîn ku bi rêk û pêk wesayîtên wan bên rawestandin, bûyer ji ber helwesta êrîşkar qewimiye û yên ev êrîş plan kirine û pêk anîne berpirsyarê bûyerê ne.
Rola çeteyên Roj
Piştî ku nasnameya Cahît Abdûrrahman ê ku hate îdîakirin di vê bûyerê de hatiye kuştin aşkera bû, hatibû fêhmkirin ku kesê navborî ji bakurê Kurdistanê ye, piştî ku demekê di nava refên PKK’ê de şer kir reviya, dest bi karê kontra kir û bû çeteyê Roj. Piştî vê bûyerê aşkera bûbû ku yên dor li qadên gerîla pêçandin û êrîş kirin çeteyên Roj bûn.
Dewleta tirk bi salan e cerdevaniyê bi rêxistin dike, yên ji nava refên PKK’ê reviyane dike kontra lê dike nake bi vê avaniya xwe ya paramîlîter nikare encamê bi dest bixe. Xuya ye Mesrûr Barzanî jî hewl dide mîna dewleta tirk bike. Tê dîtin ku hewl dide bi bikaranîna çeteyên Roj û hêza taybet a bi navê Leşkerî Gulan li dijî PKK’ê encamê werbigire. Beriya niha gelek caran di çapemeniyê de hate weşandin ku çeteyên Roj bi destê dewleta tirk tên amadekirin û perwerdekirin.
Provokasyona nû
Li gorî agahiyên ji çavkaniyên xwecihî hatin wergirtin, PDK dixwaze bi destê çeteyên Roj li ser rêya Dêreşê Seytereyê çêbike, bi vî rengî hewl bide liv û tevgera gerîla ya li qadê asteng bike. Xelkê herêmê bi fikar e ku ev hewldana PDK’ê dikare bibe sedema encamên gelekî giran. BEHDÎNAN
