Polîsanê tirkî yê ke bi wesayîtanê zirxinan banê HDPyî yê Amedî girewto binê ablûqa hemwelatijo bi nameyê Cîhan Can bi eciqnayîşî qetil kerd
Amed de wesayîtêko zirxin ê polîsanê tirkî yê ke 20ê teşrîna peyêna 2018î ranata banê Partîya Demokratîke ya Şaran (HDP) girewto binê ablûqa, Cîhan Cano ke muhendîsê înşaatî yo (30) bi eciqnayîş qetil kerd.
Dimenê mobese yê ke kewtî destî de yeno vînayene ke Can xeylêk wewxt binê wesayîtî de maneno û rixmo ke polîsan û dîyo ke o binê wesayît de yo ê nêvendenê. Der û dorê ra hemwelatijî polîsan hîşar kenê û înan danê vindarnayene. Canî cayê qewîmîyayîşî de cuya xo vînî kerde. Can seba otopsî ame berdene Nêweşxaneyê Dewlete yê Selahattîn Eyyubî. Nêweşxane hetê polîsan ra gerîya binê ablûqa. Keyeyê Canî û parlamenter û îdarekarê HDPyî yê bajarî şîyî nêweşxane. Yeno pawetene ke dimayê otopsî Can do Goristanê Yenîkoyî de bêro definkerdene.
Banê HDPyî yê Amedî badê grevê veşanîyê yo ke vera tecrîdê Îmraliyî hetê Leyla Guvene ra 8 teşrîna peyêna 2018î de ame destpêkerdene, 20ê teşrîna peyêna 2018î ra nata binê ablûqaya polîsan de yo. Badê qedîyayîşê grevî na rey zî 3ê êlule de keyeyê ke îdîa kenê ke qijê înan ameyî şawitene koyî, verê banê partîye de dest bi çalakîya roniştişî kerde û ablûqaya polîsan zî yena domnayene. AMED
