Ji bo piştgiriya bi çalakiyên greva birçîbûnê re, parlamenter û hevşaredarên HDP’ê xwestin ku li ber Girtîgeha Tîpa E ya Amedê daxuyaniyekê bidin. Lê polîsan avahiya HDP’ê dorpêç kir û nehiştin ku parlamenter û hevşaredar ji avahiya partiyê derkevin
Parlamenter û hevşaredarên Partiya Demokratîk a Gelan (HDP) ji bo piştgiriya bi grevên birçîbûnê ku ji bo rakirina tecrîda girankirî ya li ser Rêberê Gelê Kurd Abdullah Ocalan hatine destpêkirin, xwestin li ber Girtîgeha Tîpa E ya Amedê daxuyaniyê bidin. Beriya daxuyaniyê jî parlamenter û hevşaredar li avahiya partiyê ya Amedê kom bûn.
Bi kombûna parlamenter û hevşaredaran re, polîsan avahiya HDP’ê ya Amedê dorpêç kir û destûr nedan ku parlamenter û hevşaredar ji avahiyê derkevin. Avahiya HDP’ê dibin ablûkayeke mezin a polîs, maşîneyên zirxî û TOMA’yan de ye. Polîsan ji bo ku rojnameger dîmen û wêneyên parlamenter û hevşaredaran nekêşin, mertalên xwe bilind kirin û dûre rojnameger ji ber avahiyê dûr xistin.
Malbatên girtiyan ku li ber Girtîgeha Tîpa E ya Amedê li benda parlamenter û hevşaredaran bûn, hatin ber avahiya HDP’ê. Malbatên girtiyan li ber partiyê dest bi rûniştinê kirin û polîsan malbatên girtiyan xistin çembere. Hewldana polîsan a astegkirin parlamenter û hevşaredaran didome. AMED
