Goristana gerîlayên HPG’ê û şervanên YPJ û YPG’ê ya li taxa Ormanê ya Gever cara 6’emîn hat rûxandin
Duh saetên şevê polîsên tirk goristana gerîlayên HPG’ê û şervanên YPJ û YPG’ê ya li taxa Ormanê ya navçeya Gevera Colemêrgê cara 6’emîn rûxandin. Li gorî agahiyên ku ji şahîdên bûyerê hatine wergirtin, polîs bi çar maşîneyên zirxî û kepçeyekê çûne goristanê û nêzî çar saetan gorên gerîlla û şervanan rûxandine.
Di encama hovîtiya polîsên tirk de dûwarê goristanê û kêlikên goran hatine parçekirin û hemû kulîlkên li derdora goran ji kokê hatine rakirine. Dîsa li gorî agahiyên ku şahidên bûyerê dane piştî rûxandinê polis li malbatan geriyane û têkildarî hovitiya xwe malbatan agahdar kirine.
Hêjayî gotinê ye heman goristan beriya niha 5 caran din jî ji aliyê polîsên tirk ve hatiye rûxandin. Di êrîşa 27’ê Nîsana 2017’an de polîsan nivîsên wek “leş” li ser kêlikên goran nivîsandibûn û hovîtiya xwe ya li hemberî kurdan raxistibûn ber çavan. COLEMÊRG
