Şoforê meqamê Şaredarîya Dîyadînî Mehmet Hayrî Orûç hetê polîsan ra vernîya awanîye de ame tacîzkerdene. Hemşaredar Evren Demîr û Betul Yaşara ke mudaxeleyê nê halî kerd hetê polîsan ra ameyî kelemçekerdene û ameyî pirodayene
Polîsan nuqteya kontrolî ya ke vernîya dekewtişê awanîya Şaredarîya Dîyadînî de ronabî de şoforê meqamê şaredarîye Mehmet Hayrî Orûçî rê tacîz kerd. Hemşaredar Evren Demîr û Betul Yaşara ke waşt mudaxeleyê nê halî bikerê hetê polîsan ra bi kelemçeyê eksî û fekûrî ser o ameyî pirodayene. Hemşaredar Demîr ame berdene bi nêweşxane.
Polîsan bi copan da serê hemşaredar Demîrî ro, dima ra bi kelemçeyê eksî ê erd ro kerd derg û pê lingan da ê ro. Hetêna ra bi copan dayî destê hemşaredar Betul Yaşare ro zî. Dimayê qewimîyayîşî polîsan dest da serê dîmenanê şaredarîye. Hemşaredar Evren Demîro ke ame berdene bi nêweşxane va: “Înan da şoforê ma ro. Ma zî destûr nêda. Înan ma eştî erd û bi kelemçeyê eksî destê ma pey ra girêdayî û da ma ro.”
Parlementera bajarî Dîlan Dîrayet Taşdemîre ya HDPyije ke awanîya şaredarîye de bî qisey kerd û wina vat, „Faşîzmê AKP-MHPyî ke sindoqan de bi îradeyê şarî nêeşka muracatê nê çîyan keno. Ewro şaredarî kerda sey qereqolî. Teberê Kurdistanî de nuqteyê kontrolî tu şaredarîyêk de çinê. Gama ke merdimî kewenê şaredarîyan rastê cigêrayîş, heqaret û tacîzan yenê. Tena Kurdistan de bicaardişêko wina taybet esto.
Bi nê rayîrî wazenê peyamêk bidê şarê kurdî. No teşebusê şikitişê îradeyî yo. Şima mudaxeleyê şoforê hemşaredaranê Dîyadînî ke hetê se ra 70ê şarî ra ameyê weçînitene kenê. Şima şoforî nas kenê, şima zanê ke bêmabên şaredaran dir gêreno. Şima heqaret şoforî rê kenê û dima ra zî hemşaredarê ke mudaxeleyê nê halî kenê derb kenê. Dima ra zî hêzê teqwîyeyî wazenê, nizdê 40 polîsan kewenê awanîya şaredarîye. Danê hemşaredaran ro, bi copan danê hemşaredar Evren û Betule ro, pê lingan danê înan ro û kelemçeyê eksî danê înan ra. Bi nê hêrişî raste rast hemşaredarî ameyê hedefgirewtene.“
Heman wextî de Taşdemîre ard ziwan ke polîsî kewtê zereyê şaredarîye û dest nayê serê dîmenanê şaredarîye zî û va: “Ez polîsî ra vana ti bi çi hawayî dest nanê serê dîmenan? Vano, ‘fermanê dozgerîye yo.‘Ez ê ra fermanê dozgerîye wazena, vano, ‚tena dayo mi.‘ Ma fermanêko winayên mumkun o? Ganî ti dokumentêkê fermîyî bîyarê, ganî ti hemşaredaran ra destûr bigêrê.”
Taşdemîre vat Kurdistan de wa qalê ‚goreyê huqûqî têgêrayîşî‘ nêro kerdene û va: “Halêkê tewr aleladeyî de zordarîye hemverê merdiman de kenê, destbend kenê û ma fehmêk ke gefan waneno dir têrî yê.” AGIRÎ
