Gruba ke seba ke beşdara Rayraşîyayîşê Demokrasîyî yê Partîya Demokratîke ya Şaran (HDP) ya Colemêrgî biba vizêr Dêrsimî ra kewte rayîr, Kuçeyê Hunerî de eşkerayîye kerde. Eşkerayîye ra dima grube waşte ke ver bi Otogarê Dêrsimî şora la polîsan nêverda. Hemsereka HDPyî ya Dêrsimî Nurşat Yeşîle va: ”Astengkerdişê heqan ê meşrûyan provakasyon o.”
Yeşîle daye zanayene ke Rayraşîyayîşê Demokrasîyî seba edalet, demokrasî, qanûnê bingeyî, çareserîya meseleya kurdan yeno kerdene û va: ”Ma seba Leyla Guven, Musa Farisogullari, Enîs Berberlîoglu rayîrî ra şinê ke dest nîya wekîlîya înan ser. Ma seba Selahattîn Demîrtaş, Fîgen Yuksekdag, Gulten Kişanake rayîrî ra şinê ke ameyî esîrgirewtene. ”
Grube eşkerayîye ra dima waşt ke ver bi Otogarê Dêrsimî şora la polîsan nêverda. Grube sloganê ‘Vera faşîzmî mil bi mil’ ame vatene. EMEP û SMFyî zî paştî da grube.
HDPyîjê ke Şirnexî ra ver bi Amedî kewtêne rayîrî hetê polîsan ra ameyî astengkerdene. Hemşaredarê Hezexî Murat Şen û Songule Erdem ê ke dest nîya wezîfeyê înan ser, rayîrê Hezexî de polîsan verê konvoyê înan girewt. Grube astengkerdişî ra dima agêraye. DÊRSIM
