Cemal Yildirim û Muhammet Semîh Karaoglû yên bi Biryarnameyên di Hukmê Qanûnê de (KHK) ji karên xwe hatin îxrackirin û piştevanê wan Resûl Kalyoncû ji bo mafên xwe ji Stenbolê ber bi Enqereyê ve meş li dar xistibûn û meşa wan îro li Enqereyê bi dawî bû. Meşvan û piştevanên wan li Kolana Sakarya ya Enqereyê kom bûn û xwestin bi daxuyaniyekê dawî li meşa xwe bînin. Polîsan çalakgeran dorpêç kir û bi hinceta ‘destûra walîtiyê nîne’ destûr neda daxuyaniyê. Piştî rageşiyê polîsan mudaxileyî wan kir, li welatiyan da û ew binçav kirin.
Parlamenterê HDP’ê yê Kocaeliyê Omer Farûk Gergerlîoglû bertek nîşanî mudaxeleya polîsan da û got ku ew mexdûr li dijî zilma KHK’iyan meşiyan, îktîdar wê nikaribe bi vê helwestê wan asteng bike û dixwazin bi awayî zilma KHK’iyan bidomînin. Gergerlîoglû da zanîn ku çalakiyek aştiyane hat astengkirin û ev nayê qebûlkirin.
Welatiyên derdorê jî bertek nîşanî mudaxeleya polîsan dan û gotin ‘Êdî bes e. Bila yên binçavkirî werin berdan.’ Polîsan mduaxeleyî welatiyan jî kir û gefa binçavkirinê li wan xwar. ENQERE
