Malbatên girtiyan ji bo ku balê bikişînin ser rewşa zarokên xwe, li Stenbolê çalakiya ‘zincîra jiyanê’ pêk anî. Polîsan êrîşî çalakiyê kir û 8 kes binçav kirin
Çalakiya greva birçîbûnê ya bêdem û bêdorveger ku bi pêşengiya hevseroka Kongreya Civaka Demokratîk (KCD) û parlamentera Partiya Demokratîk a Gelan (HDP) a Colemêrgê Leyla Guven di 8’ê adarê de dest pê kir, berdewam e. Li girtîgehên bakurê Kurdistanê û Tirkiyeyê jî bi hezaran girtî di greva birçîbûnê de ne. Bi heman boneyê di 30 nîsanê de koma yekemîn a girtiyên ji doza PKK û PAJK’ê ku ji 15 kesan pêk tê, dest bi çalakiya rojiya mirinê kir û îro jî 15 girtiyên din li çalakvanên rojiya mirinê zêde bûn.
Ji bo rakirina tecrîdê, piştgiriya bi çalakiya greva birçîbûnê û bal kişandina ser rewşa girtiyên di greva birçîbûnê de, di serî de dayik û malbatên girtiyan gelek kes çalakiyan li dar dixin. Di vê çarçoveyê de malbatên girtiyan li Emînonu ya li Çarşiya Misirê ya Stenbolê kom bûn û çalakiya ‘zincîra jiyanê’ pêk anîn. Di dema çalakiyê de malbatan dirûşmên ‘Bila tecrîd bi dawî bibe û Leyla bijî’ û ‘Bijî berxwedana zindanan’ berz kirin.
Malbatên ku zincîra jiyanê ava kirin, bi vî awayî qederekê meşiyan. Lê polîsan tehemûla çalakiyê nekirin û êrîşî malbatan kir. Di encama êrîşa polîsan de rojnameger Zeynep Kuray jî di nav de, 8 kes binçav kirin. STENBOL
