Banê HDPyî yê Amedî de parlamenterî zî tede 10 kesê ke grevê vêşanîye de yê, polîsan bînşewe eşt ser. Polîsan berê teberî şikit û kewtî zere. Parlamenterê HDPyî Wanî Tayîp Temel û Mûrat Sarisaçi derb kerdî û 7 çalakwanî destbend kerdî
Grevê vêşanîye yo ke semedê wedartişê tecrîdê serê Rayberê Şarê Kurdî Abdullah Ocalanî banê Partîya Demokratîke ya Şaran (HDP) yê Amedî de yeno viraştene, reya diyîne polîsan eşt ser û 7 çalakwanî destbend kerdî.
Saetanê şanî de polîsan dormeyê banê HDPyî girewt. Parlamenteran ra Ebrû Gunaye, Mûsa Farîsogûllari, Remzîye Tosûne, Selçûk Mizrakli, Semra Guzele û Pero Dundare verê berî de barîkat na ro. Polîsan barîkatê parlamenteran şikit û ber û pencreyî şikitî kewtî zere. Polîsan parlamenterê HDP’yî yê Wanî Tayîp Temel û Mûrat Sarisaçî derb kerdî û 7 çalakwanî destbend kerdî.
Çalakî hetê parlamenterî Dersim Dage, Tayîp Temel, Mûrat Sarisaç û endamanê partîye Salîh Cansever, Îsmet Yildiz, Sevîcan Yaşare, Salîh Tekîn Bîlal Ozgezer, Abdullhalîk Kûrt û Yûsûf Ataşî ra yena domnayene. AMED
