Polîsan çarçeweya operasyonê qirkerdişê sîyasîyî de eşt Komeleya Cinîyan ya Rosa ser. Ame zanayene ke polîsan berê komele şikit û kewtî zere û dest na heme ewreqan ser.
Komeleya Cinîyan ya Rosa ke hesabê xo yê medyaya sosyale ser ra eşkerayîye daye û vat: ”Ma roja ronayîşê komeleya xo ra heta ewro tim têkoşîn kerd û ewro ra tepîya zî do têkoşîn bikerê. Ma nê caardişê bêhuqûqî yê vera komeleya xo qebûl nêkenê û vera hêrişê çînkerdişî yê sîstemê camêrdê serdestî de do çirey çok nêdê. Ma veng danê heme dezgehanê cinîyan ke wa paştî bidê ma. Wa embazê ma yê ke gerîyayî nêzaret cadê bêrê veradayene.”
Eşkerayîye de ame vatene ke ê do ewro saete 13.00î de verê komele de derheqê embazanê xo de eşkerayîyêke bidê û ame vengdayene ke wa heme pawitoxê heqî paştî bidê înan û vengê xo berz bikerê.
Kesê ke operayonê qirkerdişê sîyasîyî de ameyî destbendkerdene nameyê înan wina yê:
Endamê ronayaxî yê Komeleya Cinîyan a Rosa Narîne Gezgor û Ayla Akat Ata, sereka Komeleya Cinîyan ya Rosa Adalete Kaya û Îdarekara komele Fatma Gultekîn, aktîvîstê Tevgerê Cinîyanê Azadan (TJA) Gulcîhane Şîmşek û Zelale Bîlgîn, hemsereko verên ê pêroyî yê Partîya Herêmê Demokratîkî (DBP)) Mehmet Arslan, endama Heyetê Rayberdişî yê Merkezî yê Partîya Demokratîke ya Şaran (HDP) Ozleme Gunduz, hemserekê HDPyî yê Yenîşehîrî Remzîye Sizici û Kasim Kaya, endamê HDPyî Mehmet Alî Altinkaynak, sîyasetmedaro kurdî Celal Yoldaş û Nazîle Tursun. AMED
