Malbatên girtiyên ku ji bo rakirina tecrîda li ser Ocalan di greva birçîbûnê de ne, ji bo ku balê bikişînin ser rewşa zarokên xwe, xwestin li ber Girtîgeha Tîpa M ya Gebzeyê çalakiyê li dar bixin. Lê malbat hatin astengkirin û polîsan wêne û dîmenên rojnamegeran jî jê birin
Ji bo rakirina tecrîda girankirî ya li ser Rêberê Gelê Kurd Abdullah Ocalan, li girtîgehên bakurê Kurdistanê û Tirkiyeyê zêdetirî 7 hezar girtî di greva birçîbûnê ya bêdem û bêdorveger de ne. Ji bo piştgiriya bi çalakiya greva birçîbûnê re û bal kişandina ser rewşa girtiyan, malbatên girtiyan jî li gelek deveran çalakiyan li dar dixin. Di vê çarçoveyê de ji 9’ê nîsanê ve malbatên girtiyan li ber Girtîgeha Tîpa M ya Gebzeyê çalakiya rûniştinê pêk tînin. Lê polîsên ku tehemûla çalakiyê nakin, her tim êrîşî dayikan dikin.
Di çarçoveya çalakiyê de, dayikên girtiyan îro jî xwestin li ber Girtîgeha Tîpa M ya Gebzeyê çalakiya xwe pêk bînin. Malbatên ku li ber avahiya Partiya Demokratîk a Gelan (HDP) a Gebzeyê kom bûn, xwestin ji vir bi wesayîtan biçin ber girtîgehê. Dema ku malbat nêzî girtîgehê bûn jî polîsan pêşiya wan girt û destûr nedan ku ber bi girtîgehê ve biçin. Di heman demê de polîsan gef li malbatan xwar û xwestin ku belav bibin.
Polîsan dîmen û wêneyên çalakiyê jê birin
Malbatên girtiyan jî ji polîsan re got ku dê belav nebin û li cihê ku lê hatine astengkirin dest bi çalakiya rûniştinê kirin. Polîsan bi darê zorê malbatên girtiyan li wesayîtan siwar kirin û ji girtîgehê dûr xistin. Her wiha polîsan kamera û wênekeşên rojnamegerên ku çalakî dişopand jî kontrol kirin û hemû dîmen û wêneyên çalakiyê jê birin. STENBOL
