Polîsanê tirkî ewro saetanê serê sibayî de qezaya Hezexî ya Şirnexî de eşt keyeyan ser. Polîsanê maskeyinan çeke ante sereyê Nurettîn Şenî û harma pîrika ci ya 90 serre zî pilizna sidoq ro.
Polîsan eşt keyeyê birarzayê hemşaradarê Hezexî Murat Şenî yo ke herinda ci de qeyûm ame cakerdene, Nurettîn Şenî ser. Polîsanê maskeyinan çeke ante sereyê Şenî, birayê ci hewayo serd û sipir de teber de vindara û pîrika ci Fatma Şen a ke 90 serre ya rê îşkence kerd. Harma pîrika Şene hetê polîsan ra pilizîya sindog ro û harme û destê aye de derbî raameyî. Reyna polîsan sereyê Abdurrahîm Şenî zî da dêsî ro, birûyê ey qelişya. Badê cigêrayîşî û hêrişê polîsan Nurettîn Şen ame destbendkerdene.
Ame zanayene ke hemen wextî de sereştişê qeza de Mehmet Fîdan de zî ame destbendkerdene. ŞIRNEX
