Awanîya HDPyî ya Amedî de bi tewrbîyayîşê parlamentera HDPyî ya Amedî Dersîm Dage 6 kesan grevê vêşanîye dîya destpêkerdiş. 8 Adare de zî bi tewrbîyayîşê parlamenterê HDPyî Tayip Temel û Murat Sarisaç û 2 hemwelatîyî zî tewrê grevî bîyî. Polîsan heta nika 3 reyan eştî serê awanîya HDPyî. Polîsan sereştişê reya 3. de 3 çalakgeran tepiştî. Polîsan Mêrsîn û Erziromî de zî eştî serê keyeyan û xeylê kesan tepiştî. Gimgim de zî 11 kesê ke ameyî tepiştiş ra 3 kesî ameyî tewqîfkerdene
Grevê vêşanîye yo ke semedê wedartişê tecrîdê serê Rayberê Şarê Kurdî Abdullah Ocalanî banê HDP’yî yê Amedî de yeno viraştene, reya hîrêyîne polîsan eşt ser û 3 çalakwanî destbend kerdî.
Banê Partîya Demokratîke ya Şaran (HDP) ya Amedî de grevê vêşanîye yo ke semedê wedartişê tecrîdê serê Rayberê Şarê Kurdî Abdullah Ocalanî hetê parlamenter Dersîm Dage, Tayîp Temel û Mûrat Sarisaç û endamanê partîye Sevîcan Yaşare, Salîh Cansever, Îsmet Yildiz, Salîh Tekîn, Bîlal Ozgezer, Abdulhalîk Kurt û Yusuf ateşî ra yena domanyene, rixmê heme hêrişanê polîsan dewam keno. 7 çalakwanê ke ameyîbî destbendkerdene înan ra 4 kesî ameyîbî tewqîfkerdene. Sereştişê 8ê Adare ra dima çalakwanî Abdulhalik Kurt, Yusuf Ateş û Salîh Canser ê ke serbest ameyîbî veradayene û çalakîya xo domnayene ewro sereştişê hîrêyîn ê polîsan de reyna ameyî destbendkerdene.
MÊRSÎN / ERZIROM
Polîsan Mêrsînî de zî saetanê serê sibayî de eştî xeylê keyeyan ser û cigêrayîşan kerdî. Polîsî sereştişê keyeyan de heme çîyan têmîyan kerdî û dest ronayî heme çîyê teknolojîkî ke keyeyan de bî. Polîsan sereştişê keyeyan de xebatkarê Rojnameyê Yenî Yaşamî Murat Sekmen û Tuba Salmane zî mîyan de endamê Meclîsê Ciwanan yê HDPyî yê Mêrsînî Rojda Salman, Diyar Turgut, Vedat Turgut, Hizbullah Ekinci û xeylê kesan tepiştî. Kesê ke ameyî tepiştene berdî mudirîya polîsan ya Mêrsînî.
TATOS
Polîsan qezaya Tatosî ya Erziromî de zî eştî serê keyeyan û heme çîyan dayî têmîyan. Polîsî netîceyê sereştişê keyeyan de namzedê hemşaredarîye yê Tatosî zî tepiştî. Polîsan serêştişê keyeyan de namzedê HDPyî yê Tatosî Muzahit Karakuşî, xebatkarê HDPyî Mehtap Demirkaya û taxa Çukuryayla de zî Abdulhadin Eserî tepiştî û berdî mudîrîya polîsan.
GIMGIM
Polîsan qezaya Gimgimî ya Mûşû de zî 9 Adare de 11 kesan tepiştbî.11 kesê ke ameyî tepiştene sewqê mehkema ameyî kerdene. 11 kesan ra 8 kesî serbest ameyî veradayene û 3 kesî zî ameyî tewqîfkerdene. Endamê Meclîsê HDPyî yê bajar Şerafettin Ozturk, lajê ci Îsmet Ozturk û Mehmet Ertaşî bi îdîaya ‘Endamîya rêxistine’ ameyî tewqîfkerdene û erşawîyayî Zindanê Tîpa Eyî yê Mûşî.
