Li bajarê Utrecht ê Hollandayê êrîşkarê tirk Gokmen Taniş di tramvayê de êrîşî rêwiyan kir. Di encama êrîşê de 3 kesan jiyana xwe ji dest da û 9 kes jî birîndar bûn. Polîsên hollandî niha jî li Taniş digerin
Li bajarê Utrecht ê Hollandayê êrîşkarekî di tramvayê de gule li rêwiyan reşand. Hat zanîn ku tramvay dema li gorî saeta herêmî di 10.45’an de ber bi Qada 24’ê Cotmehê ve diçû rastî êrîşê hatiye. Êrîşkar piştî bûyerê reviya. Polîs niha li êrîşkar digerin.
Têkildarî mijarê Serokê Şaredariya Utrechtê Jan van Zanen agahî dan û diyar kir ku di êrîşê de heta niha 3 welatiyan jiyana xwe ji dest daye û 9 welatî jî birîndar in. Der barê mijarê de polîsên Utrechtê jî li ser hesaba xwe ya twîtterê agahî dan û ragihandin ku ku êrîşkar kesê bi navê Gokmen Taniş (37) ê ji Tirkiyeyê ye. Polîsan ji hemwelatiyan xwest ku dema Taş dibînin bila nêz nebin û agahî bidin hêzên ewlekariyê.
Agahiyên balkêş
Der barê mijarê de karmendekê tirk bi BBC’yê re axivî û agahiyên balkêş dan. Karmendê tirk da zanîn ku êrîşkar Gokmen Taniş di 2’yê tîrmeha sala 1981’an de li Yozgatê ji dayik bûye. Karmendê tirk daxuyand ku Taniş beriya niha jî li Çeçenistanê şer kiriye û çend sal berê bi hinceta ‘têkiliya bi DAIŞ’ê re’ hatiye girtin û piştre jî hatiye berdan.
Serokwezîrê Hollandayê Mark Rutte jî bûyer weke ‘êrîşa terorî’ bi nav kir. Rutte diyar kir ku li pey êrîşkar ketine û weke hikûmetê jî maseya krîzê ava kirine. Di heman demê de rayedaran pêşniyar kirin ku dibistan bên girtin. UTRECHT
