Emîne Şenyaşar ji bo hevser û du kurên xwe yên ji aliyê xizmên wekîlê AKP’î hatin qetilkirin, bi daxwaza “edaletê” tevî kurê xwe Ferît Şenyaşar li ber Edliyeya Rihayê 17 roj in çalakiya rûniştinê dike.
Malbat îro jî hatin ber avahiya edliyeyê û dest bi çalakiya xwe ya rûniştinê kir. Lê belê polîsan êrîş birin ser malbatê û dest danîn ser wêne û pankartên ku malbatê hilda bû. Ferît Şenyaşar ku demeke dirêj li dijî polîsan li ber xwe da wiha got: “17 roj in em li vir in. Heta niha we çi ji me re got, me kir. Dema ku me dest pê kir em li hundir bûn, em derxistin. Ji niha û pê ve hûn me bikuje jî ez gavekê paş ve neavêjim.”
Polîsên tirk her wiha dîmen û wêne kişandina rojnamegeran jî asteng kir.
Polîsan dor li malbatê Şenyaşar girtine. Emîne Şenyaşar û kurê wê Ferît Şenyaşar di nava dorpêçiya polîsan de nobeda “edaletê” dewam dikin. RIHA
