Ji bo protestokirina tecrîda giran a li ser Rêberê Gelê Kurd Abdullah Ocalan li Wanê meşek hat lidarxistin. Polîsên tirk êrîşî meşê kirin û herî kêm 40 kes binçav kirin.
Bi pêşengiya KCD, TJA, DBP, HDP, MED TÛHAD-FED, OHD û Meclisa Dayikên Aştiyê li hemberî tecrîda li ser Îmraliyê wê li Wanê meşek bihata lidarxistin. Hevserokê KCD’ê Berdan Ozturk, hevserokê DBP’ê Keskîn Bayindir, parlementerên HDP’ê Sezaî Temellî, Mûrat Sarisaç, Mûazzez Orhan, Huseyîn Kaçmaz, Saît Dede, Hasan Ozguneş û rêveberên HDP û DBP’ê li pêşiya Bedestena Aydin Perîhan û koma din jî li Xaçerêka Ezbercîlerê kom bûn.
Piştî ku gel kom bû polîsan li hemû kolanan ketin û derketin girtin. Gel jî bi sloganên ‘Bijî berxwedana zindanan’ bersiv dan polîsan. Polîsan dora gel girt û nexwest gel bimeşe. Polîsan êrîşî gel kir û gelek kes binçav kir.
Polîsan dora koma li Xaçerêka Ezbercîler jî girt. Kesên ku xwestin tev li meşê bibin hatin astengkirin û hatin binçavkirin. Dema ku gelek kes ketin kolanan û sloganên ‘Bijî berxwedana zindanan’ berz kir, polîsan bi gaz û fîşekên plastîk li gel da. Jineke ji ser hişê xwe çû.
Di destê sibehê de hemû rêyên Cûmhûriyet, Maraş û Kişlayê û rêyên diçin vir hatin girtin. Li ser bajêr helîkopter bi nizmî digere. Polisan hemû kolan girtine û li GBT’ya hemû kesan dinihêre. Li pêşiya avahiyên HDP û DBP’ê û saziyên din jî polîs hatine danîn.
