Polîso bi nameyê H.A.yo ke bi otobuse muhendis Cîhan Canî bi eciqnayîşî qetil kerdbi ame veradayene û pawitişê xo de wina va: “Wexto ke wesayît leqa, mi va belka otobuse kolî ser de derbaz bîya.” Avûkatê keyeyê Canî, Fuat Coşacakî zî dîyar kerd ke tehqîqat seba xelisnayîşê sucdarî ameyo rayîrberdene
Amed de wesayîtêko zirxin ê polîsan yê ke 20ê teşrîna peyêna 2018î ranata banê Partîya Demokratîke ya Şaran (HDP) girewto binê ablûqa, Cîhan Cano ke 33 serrî yo û muhendîsê înşaatî yo bi eciqnayîş qetil kerdbi. Dimenê mobese yê ke kewtî destî de yeno vînayene ke Can xeylêk wext binê wesayîtî de maneno û rixmo ke polîsan û dîyo ke o binê wesayît de yo ê nêvendenê. Der û dorê ra hemwelatijî polîsan hîşar kenê û înan danê vindarnayene. Canî cayê qewîmîyayîşî de cuya xo vindî kerdbi. Badê hedîse polîso bi nameyê H.A.yo ke bi otobusa polîsan ya çevîke muhendis Cîhan Canî bi eciqnayîşî qetil kerdbi, ameybi tepiştene û ame zanayene ke dozger waşto ke polîs bêro tepiştene, labelê polîs hetê mehkema ra ameyo veradayene.
Qaşo vernîya xo nêdîyo
Polîs H.A. îfadeyê xo yê asayîş û dozgerîye de wina vato: “Wexto ke wesayît leqa, mi va belka otobuse kolî ser de derbaz bîya. Mi va belka otobuse qelibîyay kolî. Ez timî şona verê HDPyî. Kuçe ser de firinêk esto û kolîyan ewja de roneno. Coka ra mi va belka kolî yo.” Polîs H.A.yî varaşîyê varanî xo rê kerd mehne ke qaşo vernîya xo nêdîyo û seke sucê ci çin bo pawitiş da.
‘Merdimo ke sey zinar pewizeno pay senî manîyeno kolî’
Avûkatê keyeyê Canî, Fuat Coşacakî zî dîyar kerd ke tehqîqat seba xelisnayîşê sucdarî ameyo rayîrberdene û wina va: “Îfadeyo ke polîsî paweno ameyo amadekerdene û bi no hawa îfade dîyayo dozger û asayîşî. Merdimo ke sey zinar pewizeno pay senî manîyeno kolî. No teberê herikîyayîşê xozayî yo. Tehqîqat seba xelisnayîşê sucdarî ameyo rayîrberdene. Ma îtirazê veradayîşê polîsî kerd. Do têkoşînê huqûqî yê keyeyî dewan bikero.” AMED
