Festîvala Kulturê Dêrsimî ya Ewropa ke her serre bi hawayêkê tradîsyonkîyî yena viraştene emser mabênê rojanê 24-25ê Gulane de şaristanê Frankfurtî yê Almanya de do bêro viraştene
Temsîlkarê federasyon, sazî û dezgeyanê Dêrsimî yê ke heman wextî de komîteya organîzekerdişî anê pê programê Festîvala Kulturê Dêrsimî temam kerd. Emser zî programêko xeylî gane yo ke tede xusûsîyetê kultur û nasnameyê Dêrsimî yê zaf-reng û zaf-ziwanî ca gênê esto.
Roja yewine ya Festîvala Kulturê Dêrsimî ya Ewropa ya 2019î ke bi slogana ‘Dêrsim ê ma yo! Dest meerze bawerî, xoza, nasname û ziwanê mi ra!’ wareyê Rebstockparkî de do bêro viraştene, na roje panelêk bi nameyê ‘Binê zordarîya modernîte de Dêrsim’ esto. Rojnamgere Guler Yildize, nûştox Erdal Emre û Cafer Tar do tewrê panelî bibê. Dimayê panelî ra do hetê Pîr Mehmet Tûranî ra cemê muhabetî bêro viraştene.
Seba Gaxanî konseptêko newe
Roja dîyine ya festivale de bi sernameyê ‘Dêrsim de Cinî û Ciwanîye’ panelêk bêro viraştene. Panelo ke do tede problemê bingeyênî yê Dêrsimî bêrê qiseykerdene parlamentera HDPyî Dilşat Cambaz Kaya û temsîlkarê FEDA Şahîn Polat tewrê ci bibo.
Do çarçewaya programê huner û kulturî yê festîvale de zî Kurdistan û Ewropa ra sîyasetmedarî, temsîlkarê sazîyan, hunermendê Dêrsimijî, Akademîya Dansî ya Dêrsimî tewrê festivale bibê. Gaxano ke tradîsyonêko xusûsî yê Dêrsimî yo do emser bi konseptêkê neweyî bêro pêşkêşkerdene. Seba domanan aktîvîte de do parkêkê kayî bêro ronayene û Koroyê Domanan ê Dêrsimî zî do sehne de ca bigêro. Domanê Dêrsimijî do bi ziwanê maya xo deyîranê xo vajê.
Ameyeyê Festîvale Cemxaneyî rê yo
Komîteya organîzekerdişî ard ziwan ke ameyeyo ke do aktîvîteyanê festîvale de bêro destfînayene do seba pawitişê bawerî, tradisyon û edetanê Dêrsimî semedê awankerdişê cemxaneyêk bêro şuxulnayene. Komite veng da heme Dêrsimijan ke tewrê festivale bibê û ci rê wayîr vejîyê. FRANKFURT
