Qezaya Pulurî ya Dêrsimî de Çimeyê Munzurî binê nameyê ‘turîzmî’ de bi projeyêkî seba rantî yenê pêşkêşkerdene. Bêdestûrê hemwelatîyan pê îhaleya peyzajî warê Çimeyanê Munzurî û Halvorî yenê talankerdene.
Vera projeyê Çimeyanê Munzurî ke xoza talan keno û cayanê bimbarekan texrîb keno, her roje vengê nêrazîbîyayîşan berz benê.
Serekê Komeleya Kulturî ya Pîr Sultan Abdalî Ganî Kaplanî vist vîrî ke hukmat bi serran o herême de na polîtîka rayra beno û vat: ”Semedê çînkerdişê vîrê komelî wazenê înan erdê cira raqilnê, eke no mero caardene mudaxaleyê ziwanê ci kenê, eke no zî mebo hêrişê îtîqadê ci kenê. Polîtîkaya na ya. Cayanê ma yê bimbarekan verê çimanê ma de rijenenê ke komelêkî çîn bikerê. Gerek şarê Dêrsimî wayîrê erd û awe xo bivejîyo. Ma zî do çiyo ke destê ma ra yeno bikerê.”
Hemserekê Şubeyê Anqara yê Komeleyanê Elewîyan ê Demokratîkan (DAD) Mustafa Karabudakî zî no proje sey hêrişê vera ziwan, tarîx û îtîqadê elewîyan name kerd û vat: ”Çimeyê Munzurî warê parkêk nîyo, merkezê îtîqadê ma yo. Eke ûca çîyêk beno şar û ocaxê û ûcayî qerarê naye danê. No projeyê çînkerdişê îtîqad û kulturê ma yo û gerek dewlete cade bido vindarnayene. Gerek vera nê projeyî çalakîyî bêrê xurtkerdene.”
Pîrê Cemxaneyê Huseyîn Gazî yê Anqara Huseyîn Oz zî vera projeyê talankerdişî hêrsê xo ard ziwan û vat: ”Herêma îtîqadî viraştişê projeyê tîcarî raşt nîyo. Têna hetê îtîqadî ra zî nê bêdestûrê şarê herême mudaxelekerdiş raşt nîyo. Pê texrîbatê ekolojîkî kulturê herême yeno hedefkerdene. Eke ewro destûr bidîyo nê projeyî siba çîyê bînî zî benê. Coka gerek protestoyê tewr pîlî bêrê kerdene ke verê ci bêro girewtene.” ANQARA
