Endamê Komîteya Navendî ya PKK’ê Qasim Engîn di 27’ê gulanê de li herêma Bradostê di encama êrîşa hewayî ya dewleta tirk de şehîd bû. Şêniyên Wargeha Penaberan a Şehîd Rûstem Cûdî (Mexmûr) jî ji bo Engîn merasîmeke bîranînê li dar xist. Di merasîmê de bi sedan welatiyên wargehê amade bûn.
Di merasîmê de hevserokê Meclisa Gel a Demokratîk a Mexmûrê Hecî Kaçan axivî û wiha got: “Em ê heta dawiyê li ser şopa şehîdan bin. Windakirina fermandarek, fîlozofek û rêhevalekî weke heval Qasim ji bo tevahî gelê kurd û PKK’ê cihê xemgîniyeke mezin e. Em weke gelê Mexmûrê ji rewşên bi vî awayî gelek biyanî nînin. Gelê kurd şahidiya lehengiya PKK’ê kiriye û bi saya wê xwe nas kiriye. Em bi navê gelê Waregeha Mexmûrê di serî de ji Rêber Apo, ji malbata şehîd Qasim û ji hevalên wî re sersaxiyê dixwazin. Em ê hertim li ser şopa rêheval Qasim bimeşin û em soza bilindkirina tekoşînê didin. Em wê hêrsa xwe bikin vegerînin têkoşînek û berxwedaniyek mezin.”
Bi domdarî jî Kaçan anî ziman ku dê bi hêrsa azadîxwazî ya ku têkoşîna wan ji Engîn girtiye, li dora Ocalan bikin xelek û berxwedaneke mezin. Kaçan wiha domand: “Em soz didin ku em xwîna rêheval Qasim Engîn li erdê nahêlin û em ê bi berxwedaneke mezin di dilê dijminde bibin tirseke mezin. Dê tucaran dijmin ne karî îradeya me bişikîne.”
Piştre jî helbesta Ebdulla Peşêw a ‘Ta ku çiraya me geş nebe’ ji dengê Qasim Engîn hate guhdarîkirin. Piştî guhdarkirina helbestê jî merasîm bi dirûşmên ‘Şehîd namirin’ û ‘Bê serok jiyan nabe’ bi dawî bû.
Li Saziya Malbatên Şehîdan ji bo Endamê Konseya Navendî ya PKK’ê sersaxî tê qebûl kirin. MEXMÛR
