Berxwedana dayikên girtiyan a li Pirsûs û Wêranşarê berdewam e. Dayik di roja 7’emîn de çalakiya xwe ya nobedê didomînin. Dayikan got ku divê êdî daxwaza zarokên wan bê qebûlkirin û diyar kir ku divê ev bê wijdanî bi dawî bibe
Bi armanca piştgiriya bi çalakiya grevên birçîbûnê ya bêdem û bêdorveger a girtiyên di girtîgehên bakurê Kurdistanê û Tirkiyeyê ku ji bo rakirina tecrîda girankirî ya li ser Rêberê Gelê Kurd Abdullah Ocalan dest pê kir û rewş wan, dayikên girtiyan ên Wêranşar û Pirsûs a Rihayê jî di çalakiya nobedê de ne.
Dayikên girtiyan li avahiya Partiya Demokratîk a Gelan (HDP) a Wêranşarê çalakiya xwe di roja 7’emîn de berdewam dikin. Tevî zextên polîsan jî, her roj bi dehan kes diçin serdana dayikan û piştgiriyê didin çalakiya wan. Têkildarî mijarê ji dayikên çalakvan Emîne Surer anî ziman ku divê her kes xwedî li grevên birçîbûnê derkeve û wiha domand: “Bila êdî daxwaza zarokên me bê qebûlkirin. Gelo ma ev qet ji xwedê jî natirsin? Ev yek bêwijdanî ye. Divê êdî dawî li vê bêwijdaniyê bînin. Zarokên me dimirin. Bêyî ew bimirin divê tiştek were kirin.”
Li Pirsûsê tevî dorpêçê jî çalakî didome
Her wiha çalakiya dayikên girtiyan a li avahiya HDP’ê ya Pirsûsê jî berdewam e. Piştî ku çalakiya dayikan dest pê kir, polîsan avahiya HDP’ê dorpêç kir û ev dorpêç hîn jî berdewam e. Lê tevî vê yekê jî di nava rojê de gelek welatiyan dayikên çalakvan ziyaret kirin û piştgiriya xwe anîn ziman. RIHA
