Wezîrîya Daristan û Citkarîye seba pezkovîyê ke neslê înan çinbîyaynî ver de yo îhale vetî. Yeno plakerdene ke no îhale reyde pezkovîyî do bêrî qetilkerdene û do îhale 13ê temmuze de bêro kerdene. Rayapêroyî reaksîyon nîşanê no qerarî da.
Ciyînê Dêrsimijî reaksîyon nîşanê destûrdayîşê îhaleyê seydê pezkovîyan ke sey dewarê Xizirî yenî zanayene dayî û dîyar kerdî ke ê destûr nêdanî qetilkerdişê pezkovîyan.
‘Ganî reaksîyonêko pêroyî bêro nîşandayene’
Cinîyan ra Ozlem Sariçiçeke ard ziwan ke pexkovî seba înan bimbarek a û wina dewam kerde: “Ganî ma tesilî destûr nêdî qetilkerdişê pezkovîyan. Ganî ma wayîrê înan bivejîyî. Ganî ma reaksîyonêko pêroyî nîşan bidî. Kesê ke pezkovîyan kişenî merdim nîyî. Heywanê xozayî yê azad û weşikî ra çi wazenî? Ma her çîyê xozayî hes kenî. Tewr zêde zî pezkovîyê Xizirî. Ganî komel hetê qetilkerdişê pezkovîyan de hîssin têbigêro.”
Hediye Serihane dîyar kerde ke ê hemverê qetilkerdişê xozayî yî û va: “Xeylê kesî hemverê qetlîyamê xozayî de vengê xo vetî, la ê wazenî ke no vengî bibirnî. Pezkovî xeylê herêman de bimbarek yenî hesibnayene. Her çiqas ke wina bibî zî ê yenî qetilkerdene. Ganî her kes bibo vengêk û hemverê înan de bivejî.”
‘Pezkovî çimeyê xozayê’
Hulya Ozkane qiseykerdişê xo de daye zanayene ke ê hemverê qetilkerdişê pezkovîyan î û nê çîyan ard ziwan ser: “Pezkovî rindîya xozayê. Eke ê çin bibî xoza zî çin beno. Pezkovî çimeyê xozayê. Ganî hemverê seydvanîye de qerarêk bêro girewtene.”
Dîlek Şanligoluye zî vat ke pezkovî çimeyê bawerîye ê û wina dewam kerde: “Qetilkerdişê pezkovîyan qetilkerdişê şarê Dêrsimî yo. Ma seydkerdişê pezkovîyan şermizar kenî û ma wazenê ke qerarê qedexekerdişê pezkovîyan bêro girewtene. Pezkovî emanetê Xizirî ya û ma do wayîrê emanetê xo bivejîyî. Çirê pezkovîyan seyd kenî. Ganî ma pêro bibî yew û peynîya nê çîyî birayê.”
Pezkovî dewarê ‘Dayika Fatma’ ya
Cinîyan ra tewr peynî Bakiye Gudere qisey kerde û aye zî bin ê vatişan êrazîbîyayîşê xo arde ziwan ser: “Pezkovî dewarê ‘Dayika Fatma’ ya. Derheqê pezkovîyan de xeylê hîkayeyî estî. Ma guneh nîyo? Pezkovî zî canêk î. Wa gunehê înan bikewo milê kesê ke qerarê qetilkerdişê înan dayî.” DÊRSIM
