Meclisa Şaredariya Yenîşehîr a Amedê di 5’ê Tebaxa 2019’an de biryar girt ku di çarçoveya qanûna 5393 ya şaredariyan de şaredarî 54 hezar TL alîkariyê bide Amedsporê. Piştî vê biryarê di 13’yê Mijdara 2019’an de qeyûm tayinî şaredariyê hat kirin. Qeymeqamê navçeyê qeyûm Mûrat Beşîkçî piştî hat tayinkirin meclisa şaredariyê fesix kir û endamên meclisa şaredariyê ji 13’yê Mijdarê pêvtir nikaribûn biçin şaredariyê.
Qeyûm Beşîkçî, bi hinceta alîkariya hatiye kirin cemawerî xisirandiye perê hatiye dayîn ji endamên meclisa şaredariyê xwest û ji bo vê teblîxat ji wan re şand.
Endamên meclisa şaredariyê jî îtiraz kirin. Endama meclisê Ronda Bat anî ziman ku şaredariya bi vîna gel bi dest ketibû hatiye xespkirin û wiha got: “Niha jî alîkariyên ku me kirine di bin navê ‘cemawerî xisiriye’ de wekî deyn ji me dixwazin. Qeyûm wekî ku rewa be tev digere û ji bo biryarên me dibêje li dijî mewzûatê ye. Çawa me ev xespkirin qebûl nekir em ê biryarên wî jî qebûl nekin. Em li pişta biryarên xwe ne.” AMED
