Qeyûmê Şaredariya Bajarê Mezin a Amedê Cûmalî Atîlla ku îdia dikir ku ‘qirûşek deyn li pey xwe nehiştiye’, derket holê ku 759 milyon û 132 hezar û 565 lîre deyn li pey xwe hiştiye
Qeyûmên ku ji hêla hikûmeta AKP-MHP’ê ve li şaredariya Partiya Herêmên Demokratîk (DBP) hatin tayînkirin, hema hema hemû şaredarî şêlandin. Yek ji van şaredariyên ku para xwe ji vê pêla talan û şêlandinê girt jî, Şaredariya Bajarê Mezin a Amedê ye.
Di çarçoveya xespkirina şaredariyan de, Cûmalî Atîlla di 1’ê mijdara sala 2016’an de ji hêla Wezîrê Karên Hundir ê Tirkiyeyê ve weke qeyûmê Şaredariya Bajarê Mezin a Amedê hatibû tayînkirin. Atîlla her çiqas tenê 2 sal û nîvan li ser kar ma be jî, ger gotin di cih de be şaredarî şêland. Tevî vê talanê jî qeyûm Atîlla li ser pankarteke wiha di got; ‘Min tenê yek qirûş deyn li pey xwe nehişt.’ Lê hêjayî bibîrxistinê ye ku qeyûm Atîlla tenê ji bo odeya meqama xwe, 2 milyon û 127 hezar û 725 lîreyên tirk xerc kiribû.
Bêguman talana qeyûm Atîlla tenê bi vê yekê bi sînor nebû. Qeyûm Atîlla her wiha tonek û 600 kîlo kadayif xwar û derket holê ku hema hema şaredarî ji bo her kesî deyndar kiriye. Atîlla, 192 milyon û 795 hezar û 302 lîreyan deynê avê, 38 milyon û 431 hezar û 978 lîre deynê ceryanê, 768 hezar û 290 lîre deynê xebatkaran, 12 milyon û 679 hezar û 231 lîre deynê muteahîdan, mîlyonek û 365 hezar û 734 lîre deynê Wezareta Derdor û Bajarvaniyê, 3 milyon û 577 hezar û 302 lîre jî deynê SGK û bacê li pey xwe hiştiye.
Deynê krêdiyan ê banqeya bajaran jî 208 milyon û 551 hezar û 166 lîre ye. Qeyûm bi giştî 759 milyon û 132 hezar û 565 lîre deyn li pey xwe hişt. AMED
