Qeyûmê Şaredariya Bajarê Mezin a Amedê Hasan Basrî Guzeloglû 8 karkerên girêdayî Daîreya Karên Çand û Civakî ji kar derxist
Qeyûmê Şaredariya Bajarê Mezin a Amedê Hasan Basrî Guzeloglû 8 karên Daîreya Karên Çand û Civakî ji kar derxist. Qeyûm, Lîsa Çalan a ku di teqîna mitînga HDP’a Amedê de ya di 5’ê Hezîranê de ji aliyê DAIŞ’ê ve pêk hatibû, her du lingên xwe winda kiribû jî ji kar derxist.
Lîsa Çalan ji 2016’an vir ve wek sêwira dikê dixebitî. Qeyûmê berê Cumalî Atîlla jî Çalan û 7 karkerên din ji kar derxistibû lê ew bi biryara dadgehê carek din vegeriyan karê xwe. Lîsa Çalan û derhêner Ruknettîn Gun û Rêzan Kaya, Zeycan Ateş, Sarya Yîgît Cengîz, Abdulhalîm Bîçer, Îslam Dagdevîren, Hoşyar Oncu bi hinceta ‘pêdivî bi van kadroyan nîne’ ji kar hatin derxistin.
Hat zanîn ku Sarya Yîgît Cengîz a ji kar hat derxistin jî 8 roj berê welidiye û ew di destûra welidandinê de ye.
‘Ez ê dîsa bikevim pey edaletê’
Têkildarî ji kar derxistinê Lîsa Çalan axivî û diyar kir ku ne dema nûkirina peymanê ye û bi hinceta ‘8 kes zêde ne’ dawî li karê wan anîne. Çalan anî ziman ku rapora wê heye û 7 hevalên wê jî bi biryara dadgehê vegeriyane karê xwe û wiha got: “Min di 2016’an de li Şaredariyê dest bi kar kir. Wê demê qeyûm tune bû. Pişt re qeyûm hat. Ez jî ji bo dermankirina xwe çûm Enqereyê. Di 4 salan de ez gelek caran emeliyat bûm. Birîna min vekirî ye û ez zêde nikarim derkevim derve. Min mexdûr kirin. Ji bo edaletê ez çûm dadgehan û hatim. Niha jî dîsa ez ê ji bo edaletê biçim dadgehê. Ez ê bikevim pey edaletek din.” AMED
