Rayîrberîya Xosere ya Vakur û Rojhelatê Sûrîye veng daye NY, YE û Yewîya Ereban û heme rêxistinanê mîyanneteweyî ke bi hawayo lezûbez hêrişê dewleta tirkî yê vera kampa Eyn Îsa bidî vindetene. Rayîrberîya Xosere daye zanayene ke badê topbaran û bombardûmanî tay keyeyê DAIŞîjan remayî û beno ke na rewşe vernîya tehlukeya pîlan akera
Hêrişê dewleta tirkî ya dagirkere û çeteyê girêdayeyê aye yê vera vakur û rojawanê Kurdistanî dewam kenî. Dewleta tirkî ya dagirkere wazena heme DAIŞîyê zîndananê rojawanê Kurdistanî serbest bibî û cok ra bêmaben zîndanan bombardûman kena. Niha zî seba ke keyeyê DAIŞîjan kampe ra bivejîyî, kampe bombardûman û topbaran kena. Artêşa tirkî hetê serê sibayî de dormeyê kampa Eyn Îsa ke bi hezaran keyeyê DAIŞijan tede yî, bombardûman kerde. Cok ra xeylê keyeyê DAIŞija kampe ra remayî.
Derheqê babete de Rayîrberîya Xosere ya Vakur û Rojhelatê Sûrîye eşkerayîyêke daye û vengê lezgînî rayapêroyî rê kerde. Eşkerayîya Rayîrberîya Xosere wina ya:
“Seba ke hukmatê Sûrîye wezîfeyê xo yê asayîşî bîyaro ca û seba ke verba hêrişanê îşxalkaran ê dewleta tirkî paşt bide Hêzê Sûrîyeya Demokratîke (HSD) peyamêk ameye viraştene. Çarçeweya peymane de destûr ame dayene ke hêzê rejîmê Sûrîye derbasê xeta sînor ê Sûrîye û Tirkîya bibê.
Rayîrberîya Xosere ya Vakur û Rojhelatê Sûrîye bi rayîrê hêzê xo yê leşkerî Hêzanê Sûrîye ya Demokratîka ke pêroyê ciwananê Sûrîye ra ame meydan, herêmanê Rayîrberîya Xosere de şaristanê Kobanê ra serra 2014 ra verba terorî şer kerde. Nê şerê xelisnayîşî verba rêxistina terorî vakur û rojhelatê Sûrîye de dewam kerdî û rojawanê Firatî Minbic, dima Girê Spî, Tebqa û heta paytextê aye Reqa û dima Dêrazor xelisnayî. Nê serkewtişê verba rêxistinan dimayê 5 serran tarîxê 23.03.2019 de cayê aye yo tewr peyên rojhelatê Dêrazarê de serkewtiş îlan kerd. Na cografyaya xelîsnaye ya 1/3 erdê Sûrîye ra û HSDyî 11 hezar şehîdî û 24 hezar birîndarî dayî. Seba ke ma şarê Sûrîye bixelisnê û pêroyê caardişan zilm û zorbazîya rêxistina terorîstan ra xelas bikê û pawitişê yewîya erd ê Sûrîye bikê, no bedelêko giran bîyo.
Projeyê ma yo sîyasî vakur û rojhelatê Sûrîye vengdayîşê parçebîyayîşî nêkerd, labelê ma seba dîyalog û çaresarîya alozîya Sûrîye bi hewayêkê haştîyane veng dayêne û ma do veng bidê. Ma hêrişê kesêkî, hêrişê dewletanê cîranan nêkerd û heta heta ma dewleta tirkî tehdît zî nêkerde. La dewleta tirkî dormeyê ma pê terorî girewt û hema zî wina kena. Rolêko menfî vilakerdişê terorî yê Sûrîye de destpêkê alozîye de kaykerd. Ewro hêrişê erdê Sûrîyeya ke HSD bi gonîya ciwananê xo nê erdî xelisna, kena.
Nê 5 rojê vîyarteyî de barbaran sivîlan rê sucî kerdî. HSD bi mêrxasî û qehremantîye verba hêrişê xo ver da û zafê şehîdî û birîndarî seba pawitişê serdestîya Sûrîye dayî. La dewleta tirkî hêrişanê xo rê dewam kena. Seba ke ma verba nê hêrişan bigêrê, ma hukmatê Sûrîye reyde pêkerd ke do sînoranê welatî serdestîya Sûrîye bipawe. Artêşa Sûrîye ya Demokratîke nê îhlalî ver vindere û herêmanê ke artêşa tirkî û çeteyê aye derbasê ci bîyî, bixelisne. No pêkerdiş firsendê xelisnayîşê pêroyê erdî û şaristananê Sûrîyeyê ke hetê artêşa tirkî ra ameyî îşxalkerdene, û şaristananê bînan virazeno.
Serê nê esasan, ma pêroyê herêmîyanê xo, pêroyê vakur û rojhelatê Sûrîye bitaybetî şaristananê serê sînorî nê pêkewtişî ra hayîdar kenê. Dekewtişê artêşa Sûrîye yê sînoranê ma bi kordîne û pêkerdişê Rayîrberîya Xosere yê vakur û rojhelatê Sûrîye beno.”
