Raywanê Rayraşîyayîşê Azadîye yê Pîlî yê ke Qersî ra kewtî rayîr roja 5ine de badê Milazgîrê Muşî resayî Kopî.
Raryaşîyayîşê Azadîye yo ke semedê azadîya fîzîkîye ya Rayberê Şarê Kurdî Abdullah Ocalanî dîya destpêkerdene roja 5ine de dewam keno. Raywanê Rayraşîyayîşê Azadîye yê Pîlî yê ke Qersî ra kewtî rayîr resayî Milazgîrê Muşî.
Raywananê Azadîye şarê qeza selam kerd û heta banê DEM Partî rayra şîyî. Derûdormeyî ra zî şar tewrê rayraşîyayîşî bi.
Verê banê partîye de Hemvervatoxê HDKyî û Parlamenterê DEM Partî Cengîz Çîçekî qisey kerd. Çîçekî bale ante zilm û zextanê îqtîdarî ser û nê vatî: ”Kurdîstan rixmê heme zordarîye çok nêdana. Ma zî ewro Kurdîstan de nê rayraşîyayîşê xo kenê ke wa bibo komelkî. Heta ke meseleya kurdan nêro çareserkerdene hûzûr û rehatî do merê nê welatî. Gama ke ma vanê çareserîya demokratîke ya meseleya kurdan, heqîqatêkê ci est o. Şarê kurdî Birêz Ocalanî sey Rayberê xo vîneno û têna ey sey muxatabî qebul keno. Tecrîdo ke wazeno Birêz Ocalan û şarê kurdî yewbînan ra raqilno, ma vera ci yê. Bi serran verî bi mîlyonan kurdan bi eştişê îmzayanê xo Birêz Ocalan sey rayberê xo qebul kerd. Na dewlete zî wextê prosesê çareserî de no qebul kerd. No zî heqîqetî mojneno. No rayîr, rayîrê heqîqetî yo, bimbarek bo. Ma do sîstemê îşkenceyî yê Îmraliyî birijnê. Serkewtiş ê înano ke semedê azadîye kewtî rayîr.”
Raywananê Azadîye banê partî de şarî reyde derheqê armancê rayraşîyayîşî de qisey kerd. Reyna tay nuşteyê Abdullah Ocalanî yê verênî ameyî wendene. Heyet dima ver bi Kopê Mûşî kewt rayîr.
Raywananê Azadîye Kopê Mûşî de bi slogananê “Bijî Serok Apo”ameyî pêşwazîkerdene.
