Partîyê sîyasîyî û rêxistinê komelê sivîlî seba ke tecrîdê vera Rayberê Şarê Kurdî Abdullah Ocalanî wedarîyo û seba ke meseleya kurdan çareser bikero Ocalan azad bibo ewro Wan û Qers de ”Rayraşîyayîşê Azadîye yê Pîlî” kenê. Rayraşîyayîş do heta 15ê sibate dewam bikero.
Wan de startê Rayraşîyayîşê Azadîye yê Pîlî otêlêke de bi eşkerayîyêke ame dayene. Sîyasetmedaranê ke Wan de startê ‘Rayraşîyayîşê Azadîye’ dayo eşkerayîye de qisey kerd.
Hemserekê DEM Partî Tuncer Bakirhanî pare kerd ke Abdullah Ocalan çareserîya meseleya kurdan de ”muxatabo verên o.” Bakirhanî vat: ”Rîyê çaresernêkerdişê meseleya kurdan ra ewro krîzê welatî benê giranêr. Çareserîya meseleya kurdan do pêro kesan rê fayde bikera. Ganî hînî polîtîkaya înkar û îmhaya kurdan ra fek vera bêro dayene. Seke ey bi xo vatbi Birêz Ocalan seba çareserîya kurdan amade yo. Ma venga dewlete û îqtîdarî danê ke Birêz Abdullah Ocalan de ronişê û meseleya kurdan çareser bikerê.”
Hemserekê DBPyî Keskîn Bayindirî vat: ”Ma do heta 15ê sibate rayraşîyayîşê xo bikerê. Ma hê serkêşîya azadîye kenê. No rayraşîyayîş teyna heqanê kurdan ney heqanê pêro şaran wazeno. Ma wazenê ke şar û dostê ma paştî bidê ma. Ma do tecrîdê Îmraliyî bişiknê. Ewro ma kîbrîtêk vist ta ke no do pêro Kurdîstan û Rojhelatê Mîyanênî roşnî bikero. Ma wayîrê ê îrade yê ke ser bikewê û azadîya Birêz Ocalanî bîyarê ca.”
Hemsereka MEBYA-DERî ya Wanî Hanim Kayaye vat: ”Tecrîd teyna vera Abdullah Ocalanî ney, şexsê ey de vera cinî û ciwanan zî yeno kerdene. Ma zanenê ke mefteyê haştîye Îmrali de yo. Coka ma tewrê nê rayraşîyayîşî bîyî.”
Hemsereka MED TUHAD-FEDî Emîne Kayaye vat: ”Key tecrîd wedarîyo zulm zî do biqedo. Ma wazenê no tecrîd biqedo. Seba ney zî no rayraşîyayîş firsend o.”
Wekîlê DEM Partî Sînan Çîftyurekî vat: ”Seba ke sîyasetê şarê kurdî bêro astengkerdene, no tecrîd yeno caardene.Wa dewlete qanûnanê xo bîyara ca û tecrîdî wedarna.”
Wekîla DEM Partî Çîçek Otluye vat: ”Ma xoverdayîşê grevê vêşanîye yê tepişteyan selam kenê. Seba cuyêka têdûşte û bê cenazayan ganî heta 15ê sibate ma sloganê ‘Biciwîya wayûbiratîya şaran’ vajê.”
Sîyasetmedarî dima Parka Musa Anterî de şîyî hetê çalakîkeranê bînan. WAN
