Seba azadîya Rayberê Şarê Kurdî Abdullah Ocalanî û çareserîya meseleya kurdan şaristananê Vakurê Kurdîstanî de di baskan ra Rayraşîyayîşê Azadîye yo Pîl yeno kerdene.
Baska Qersî roja 8ine de resaye Dêrsimî. Raywananê Azadîye hêverî şi pirdo ke Gulîstan Dokuye tewr peyêne uca de amebî dayene û eşkerayîye daye.
Wekîla DEM Partî Kezîban Konukçuye pare kerd ke Dêrsim rixmo ke bi kamerayan tim yeno teqîbkerdene Gulîstane nêdîyaya û tehqîqatê serebûtî zî bi hawayêkê raştî nêameyo kerdene. Kezîbane Konukçu vat: ”Ma seba pêro şaran azadîye wazenê. Heta ke azadîye bêra nê erdî ser ma rayraşîyayîşê xo bikerê.”
Dima raywanan ver bi merkezê Dêrsimî rayraşîyayîş kerd. Şarî bi dowîzanê ”Şîyayîşê Xelaşiya” girse pêşwazî kerd. Hunermendê MKMyî zî bi deyîran tewrê rayraşîyayîşî bîyî.
Meydanê Seyîd Rizayî de Serekwekîla Grûba DEM Partî Gulîstan Kiliç Koçyîgîte qisey kerd û vat: ”Ma erdê Alî Şêr, Sakîne û Mazlûman de seba azadîya Abdullah Ocalanî rayîr a şinê. No welat welatê ma yo. Dêrsim de ganê ma est ê. Nika wextê haştîye yo coka ganî ma vengê Birêz Ocalanî rê bibê veng. Dêrsimî sereyê xo dayo la sirê xo nêdayo. Nê koyî ma pawenê.”
Hemsereka DBPyî Çîgdem Kiliçgun Uçare vat: ”Îqtîdar kultur, nasnameyê ma înkar keno. Ma vanê ke ‘mefte ma yê.’ Nika Birêz Ocalan binê tecrîdî de tepişîyeno. Ma seba azadîya ey têkoşîn bikerê û na menga Xizirî de seba azadîya ey rojeyan bigêrê.” DÊRSIM
