Colemêrg de vera destsernayîşê şaredarîye DEM Partî 13ê hezîrene de (siba) serkêşîya KCD, HDK, DEM, TJA, DBP, Îtîfaqê Kede û Azadîye û Rêxistinanê Komelê Sîvîlî de do bi şîarê ”Şaredarîyî yê ma yê, ma destûrê destsernayîşî nêdanê” mîtîng bêro kerdene. Verê mîtîngî qezaya Şemzînan de Rayraşîyayîşê Demokrasîyî perey dîyabi destpêkerdene.
Rayraşîyayîşê Demokrasîyî roja hîrêyinî de resa merkezê bajarî ke Şemzînan, Gever û Çelê de ame kerdene. Hemsereka Pêroyî ya DBPyî Çîgdeme Kiliçgun Uçar û wekîlî tewrê rayraşîyayîşî bîyî. Rayraşîyayîşo ke ewro saetanê serê sibayî de ame destpêkerdene bi slogananê “Jin, jiyan, azadî”, “Qeyûm defbi, şaredarîyî yê ma yê”, “Bijî berxwedana Colemêrg” ame kerdene.
Raywanan esnafî zîyaret kerdî. Çîgdeme Kiliçgun Uçara ke zîyaretê esnafan de qisey kerd, nê vatî: ”Ma verê ronayîşê Komara Tirkîya ra tîya de yê. Cayo ke ma tede bi kultur û ziwanê xo qisey kenê de nêverdenê ma xo îdare bikerê. Ma sey sûcdarî ramojnenê la eslê xo de sûcdaro tewr pîl îqtîdarê AKP-MHPyî yo. Nê partîyî kombîyayîşê tehdîtan kenê. Qet embazêkê/a ma sûcdar nîyo/a. Cezayê ke dîyenî ma vesîkayê AKPyî yê meseleya kurdan û înkarê ci yo.”
Badê zîyaretê esnafan ê qeza dewê , Serêspî, Dêra Mersa û Dizê ameyî zîyaretkerdene. Dewijan vat ê destsernayîşê şaredarîye qebul nêkenê, ê do tewrê mîtîngî bibê û wayîrê îradeyê xo bivejîyê. Raywanî do merkez de rayraşîyayîş bikerî û eşkerayîye bidê.
