Rejîma Îranê weke hêzên artêşa tirk, gelek herêmên Biradostê topbaran kir. Di encama topbaranê de sivîlek hate qetilkirin û 2 sivîl jî birîndar bûn
Rejîma Îranê gundên Telan, Şikene û Male Mela yên herêma Biradostê yên girêdayî Hewlêrê topbaran kirin. Li gorî agahiyên ji herêmê, li gundê Telan topek li ber malekê ket. Çavkaniyên ji herêmê da zanîn ku di encama topbarana rejîma Îranê de welatiyekî jiyana xwe ji dest da û 2 welatî jî birîndar bûn. Temamiya kuştî û birîndaran ji heman malê ne.
Hêjayî bibîrxistinê ye ku dewleta tirk ji bo dagirkirina axa başûrê Kurdistanê, ev demeke bi hevkariya PDK’ê dest bi êrîşeke berfireh kiriye. Dewleta tirk ku dixwaze herêm ji sivîlan bê xalîkirin, heta niha gelek caran êrîşî qadên sivîlan kir û gelek sivîl qetil kirin û gelek jî birîndar kirin. Di demekî ku dagirkerî gav bi gav berfireh dibe de rejîma Îranê jî weke piştgiriyê bide vê hewla dagirkeriyê, dest bi topbarankirina herêmên sivîlan kir. HEWLÊR
