Hêzên rejîma Îranê li ser sînorê Rojhilat careke din kolberek qetil kir. Kujerên rejîma Îranê li şûna ku bên cezakirin, ji hêla desthilatiyê ve tên teşwîqkirin
Rejîma Îranê qetlîamên xwe yên li dijî kolberan bênavber didomîne. Li gorî agahiyan, hêzên rejîma Îranê li gundê Hanê Germele yê Hewremanê gule li kolberan reşandin. Di encama gulebaranê de kolberek hate qetilkirin û yek jî birîndar bû.
Kolbernewsê jî di 26’ê hezîranê de ragihandibû ku li bajarê Banê di encama êrîşa rejîma Îranê de kolberê zarok ê bi navê Hêmîn Salehpur hatibû qetilkirin. Di 13’ê hezîranê de jî rejîma Îranê li gundê Zelê êrîşî kolberan kir û kolberê bi navê Mihemed Hisên Zade ku bavê 2 zarokan bû qetil kir û 3 kolber jî birîndar kkirin.
Rojane tên qetilkirin
Rejîma Îranê li rojhilatê Kurdistanê hema hema rojane kolberan dikuje. Par tenê di meha nîsanê de herî kêm 40 kolber hatin kuştin û bi dehan jî birîndar bûn. Kujerên rejîma Îranê li şûna ku bên cezakirin, ji hêla desthilatiyê ve tên teşwîqkirin.
Rojhilatê Kurdistanê ji ber polîtîkayên rejîma Îranê sal bi sal hate xizankirin û yek ji herêma herî xizan a Îranê ye. Rejîma Îranê razemeniyê li Rojhilat kêm dike û pêşî li pêşketina çandinî û pîşesaziyê digire. Gelê kurd jî neçar dimînin ku kolberiyê bikin. HEWREMAN
