Hevşaredarên Hezexê Songul Erden û Mûrat Şen ku qeyûm tayînî şûna wan hat kirin, anî ziman ku dê rejîma ku ji vîna gel ditirse û qeyûm tayînî vîna gel dike, têk biçe
Duh bi talimata Wezareta Karê Hundir qeyûm tayînê 4 şaredaran hat kirin. Yek ji van şaredaran jî Şaredariya Hezexê ya Şirnexê bû.
Hevşaredarên Hezexê Songul Erden û Mûrat Şen, derbarê tayînkirina qeyûman de axivîn û diyar kirin ku dê rejîma ku ditirsa têk biçe.
Hevşaredar Mûrat Şen bal kişand ser tayînkirinên qeyûman ên berê û got ku bi destê xwe yên qirêj cardin qeyûm tayînî şaredariya wan kirine. Şen anî ziman ku xizmeta wan îktîdarê nerihet kiriye û wiha got: “Gel baş dizane ku qeyûm ji bo dizî û rantê hatine. Bi tayînkirina qeyûman careke din derket holê ku hikûmet ji gel ditirse. Lê em ê tim li cem gelê xwe bin. Em serbilind in. Ew ji bo diziyê hatine. Ên bi paş ve biçin ûy ên bitirsin dê ew bin.”
Hevşaredar Songul Erden jî da zanîn ku wê teblîxat îmze nekiriye û ew ê qeyûman qebûl nekin û ev tişt anî ziman: “Vîna gel hat xespkirin. Lê em niha di nav gelê xwe de ne. Em bi gelê xwe serbilind in. A hatiye kirin bêhiqûqîtî ye. Hezex a me ye.” ŞIRNEX
