Misteşarê Rêxistina Îstîxbaratê Neteweyî yê Tirkîya (MÎT) Hakan Fîdanî 11ê êlule de bajarê Bexda de sere de Hamîs Hançer, Mustafa el-Kazimî û Berhem Salîhî û xeylê selahîyetdaran reyde Iraqî de pêvînayîşanê nimiteyan pê ardî. Ame vatiş ke Fîdan no rey zî Serekê Îstîxbaratê Sûrîye Alî Memlukî reyde pêvînayîş pê ardo. Goreyê xebera Reutersî; malumatê pêvînayîşî di selahîyetdaranê tirkî û çimeyêk girêdayeyê Şamî ra ameyo girewtiş. Ame zanayene ke pêvînayîş bi mabeykarîya Rûsyaye ameyo kerdiş.
Goreyê malumatê selahîyetdaranê tirkî ê payeberzan; wextê pêvînayîşî de Serekê MÎTî Fîdan û Serekê Îstîxbaratê Sûrîye Alî Memlukî ameyî tê het û têameyîşê pîya ê wezîranê karê teberî yê wirdî welatan munaqaşa kerdî. Selahîyetdarê tirkî vatî; “Rûsya wazena ke Sûrîye û Tirkîya problemanê xo çareser bikerî û hem Sûrîye û hem zî Tirkîya pêkerdişê ke bi menfîetê her kesî yeno mohr kerdî.”
Ame zanayene ke Rûsya şerê Ukrayna ra tay çimeyanê xo yê leşkerî tê dima Sûrîye ra ancena û seba ‘lezkerdişê çareserîya Sûrîye’ Tirkîya ra wazena ke têkilîya xo bi Serekê dewleta Sûrîye Beşar Esadî reyde baş bikera.
Çimeyo girêdayeyê Şamî zî da zanayen ke Rûsya seba ke pozîsyonê xo yê dagirkerîya Ukrayna nêbedelna, Sûrîye teşwîqê muzakereyan kena. Çime dewamê ci de wina vat: “Hakan Fîdan peynîya aşma tebaxe de ame Şam û di reyan pêvînayîşî pê ard. Amacê nê pêvînayîşan oyo ke kombîyayîşê hîna berzî bêrî viraştiş.”
