Sazî û dezgehên Rêveberiya Xweser a herêma Firatê li dijî êrîşên dewleta tirk a dagirker bang li gelê herêmê kir ku berxwedanê xurt bike. Her wiha ji hêzên navneteweyî jî xwest ku dawî li bêdengiya xwe bînin.
Têkildarî êrîşên dewleta tirk a dagirker ên li ser Bakur-Rojhilatê Sûriyeyê, bi taybetî Kobanê, sazî û dezgehên Rêveberiya Xweser a herêma Firatê daxuyaniyek dan çapemeniyê.
Daxuyanî ji aliyê hevserokê Kar û Barên Rêveberiyê yên herêma Firatê Xalit Ceradê ve hat dayin.
Di daxuyaniyê de hat ragihandin ku dewleta tirk bi armanca dagirkeriyê, Sûriyeyê wêran dike û wiha hat gotin: “Armanca dewleta tirk têkbirina projeya me ya neteweya demokratîk e, ku gelên Sûriyeyê hemûyan vedihewîne.”
Di daxuyaniyê de işaret bi piştgiriya dewleta tirk a bi komên çete û DAIŞ’ê hat kirin û ev tişt hat gotin: “Bi hêzên xwe yên bejahî û hewayî êrîşî Bakur-Rojhilatê Sûriyeyê dike. Dewleta tirk seranserê sînorê herêmê topbaran dike. Bû sedema gelek şehîd û birîndaran.”
Di dewama daxuyaniyê de bêdengiya hêzên navneteweyî ya li hemberî vê êrîşkariya dewleta tirk hat bibîrxistin û hat ragihandin ku di encama vê bêdengiyê de topbaran û bombardûman li Dirbêsiyê û Amûdê, li Kobanê û gundewarên hatin kirin, zarokekî 12 salî şehîd bû, 5 kes jî birîndar bûn.
Saziyên rêveberiya xweser diyar kirin ku herî dawî gundê Sinciq Sedûn bi balafirên bêmirov ên biçek ên dewleta tirk hat bombekirin, di encamê de 4 kes şehîd bûn û êrîşkariya dewleta tirk şermezar kirin.
