Navenda Nûçeyan |
Meclisa Giştî ya Rêveberiya Xweser a Bakur û Rojhilatê Sûriyeyê îro têkildarî êrîşa çeteyên DAIŞ’ê ya li ser girtîgeha Sînaa ya li taxa Xiwêran a Hesekê daxuyaniyek da.
Di daxuyaniyê de wiha hat gotin:
“Armanca sereke ya êrîşê kontrolkirina Hesekê û dabînkirina korîdorekê ji bo terorîstan di navbera kampa Hol û Til Temirê de ye.
Careke din isbat bû ku zîhniyeta dewleta tirk bi rê ve dibe, li ser daxwaz û hêviyên berfirehbûn û dijminane ava bûye ku xak û mirovan li Sûriyeyê û Bakur û Rojhilatê Sûriyeyê dike hedef. Dewleta tirk bi rêya çeteyên xwe yên DAIŞ’ê hewl dide ewlehiya herêmê têk bibe, projeya demokratîk a Rêveberiya Xweser a Bakur û Rojhilatê Sûriyeyê bi dagirkirina yekser an jî hedefgirtina sivîlan bi rêya dronan, tune bike.
Vê carê çete li baregehên taybet ên li Serêkaniyê, Girê Spî perwerde kirin û şandin taxa Xiwêran a Hesekê û êrîşî Girtîgeha Sînaa kir ku derdora 5 hezar DAIŞ’î tê de hene. Li gel neparastina hikûmeta Şamê sînorên Sûriyeyê û bêdengiya wê li hember destwerdana domdar a dewleta tirk li dijî axa Sûriyeyê, ji vê yekê armanc dike ku Hesekê kontrol bike, korîdorekê ji bo terorîstan di navbera Til Temir û Kampa Holê de û heta Iraqê veke. Ev mudaxele li dijî qanûnên navneteweyî û serdestiya welatekî ye. Lê hêzên me bi piştgiriya gelê me yê Bakur û Rojhilatê Sûriyeyê û Koalîsyona Navneteweyî ev plana kirêt têk bir.
Em bang li gelê xwe dikin ku xwedî li Rêveberiya Xweser derkevin. Li hember komployên li hundir û derve piştgiriya wê bikin. Em fedakariyên şehîdan silav dikin ku li hember DAIŞ’ê li ber xwe didin. Em fedakariyên şehîdan silav dikin û bang li koalîsyonê dikin ku rola xwe pêk bîne û hewl bide tundrawên ji nasnameyên cuda vegerîne welatên wan.”
