Siyasetmedara kurd Aysel Tûglûk nexweş e û li Girtîgeha Kandirayê ya Tîpa F’yê tê ragirtin. Li gel teşhîsa nexweşiya “demnas” danîne ser Tûglûk jî ji ber raporên Saziya Tiba Edlî nayê berdan. Tûglûk ji ber nexweşiyê nikare pêdiviyên xwe rojane dabîn bike.
Wekîla Seroka Koma HDP’ê Meral Daniş Beştaş û parlamentera HDP’ê ya Agiriyê Dîrayet Dîlan Taşdemîr di 17’ê cotmehê de li girtîgehê bi Tûglûk re hevdîtin kirin.
Taşdemîr ji ajansa me re qala hevdîtinê kir û got wan li Kandirayê bi siyasetmedarên jin re hevdîtin kiriye. Taşdemîr anî ziman ku wan rewşa Aysel Tûglûk li cih çavdêr kirine û dîtina Aysel a di wê rewşê de ji wan re zor hatiye û tesîrek neyînî li ser wan kiriye.
‘Rê li ber mirinê vedike’
Taşdemîr dazanîn ku wan nexweşiya Tûglûk ku girantir bûye ferq kirine û agahiyên derbarê wê de ji Fîgen Yuksekdag ku pê re di heman qawîşê de dimîne girtine. Taşdemîr anî ziman ku Tûglûk rojane nikare pêdiviyên xwe şexsî dabîn bike û bi tena serê xwe nikare tiştek bike. Taşdemîr diyar kir ku neberdana Tûglûk rê li ber mirinê vedike.
‘Tolê ji Ayselê digirin’
Taşdemîr destnîşan kir ku li gel Wezareta Dadê û Saziya Tiba Edlî (ATK) rewşa Aysel Tûglûk dizanin jî lê ji ber raporên ATK’ê nayê berdan û ji bo Tûglûk di hefsê de ragirin raporan dikin hêcet. Taşdemîr anî ziman ku nêzîkatiya li hemberî Tûglûk bi meseleya kurd ve girêdayî ye û got: “Neberdana Ayselê û ragirtina wê ya li hefsê dixwazin tolê jê hilînin. Bi nêzîkatiyek tolhildanê nêzî Ayselê dibin. Divê em li dijî îşkenceya li ser Ayselê dengê xwe bilind bikin û xwedî lê derkevin.”
