Merkezê Heqanê Cinîyan û Bicaardişî yê Baroyê Amedî cinîyanê ke grevê vêşanîye de yê reyde pêvînayîşî kerdî û nê pêvînayîşî kerdî raporêk. Rapor de vajîya rewşa weşîye ya cinîyanê ke grev de yê resaya nuqtaya mergî
Merkezê Heqan Cinîyan û Bicaardişî yê Baroyê Amedî derheqê cinîyanê tepişteyanê ke Zîndanê Tîpê Eyî yê Amedî de greve vêşanîye de yê raporêk amade kerd. Merkezî rapor bi eşkerayîyêka nûştekîye vila kerd.
Rapor de ame vatene ke Zîndanê Tîpa Eyî yê Amedî de hûmara cinîyan ê tepişteyanê ke grev de yê 11 a. Rapor de ame vatene Hîlal Olmeze, Evîn Kaya û Kîbrîye Evrene 16ê Kanûn a 2018î ra nata grev de yê, rîskê enfeksîyonî esto û seba ke problemê înan ê weşîye bîyê ê nêeşkayê pêvînayîş bikerê.
Rapor de ame vatene ke hûmara cinîyanê ke grev de yê bi pêroyî nizdîyê 3 hezar a û roje bi roje halê înan ê weşîye hîna bena xirab. Rapor de ame vatene ke sey Merkezî ê wazenê ke gamê ke waştişê çalakwananê grevê vêşanîye rê bibê cewab bêrê eştene, hewna ke îhlalkerdişê heqê cuye nêvirazîyayê çîyo ke lazim o bêro kerdene. AMED
