Siddik Gulero (82) ke Zîndanê Îzmîrî rê surgun bîyo û lîsteya tepişteyanê nêweşanê giranan ê Komeleya Heqê Merdiman (ÎHD) de yo, her roje rewşa ci bena giranêr. Keyeyê Gulerî bi wesîleya roşanê Remezanî Guler zîndan de dî. Kênaya Siddik Gulerî Ayşe Guler derheqê rewşa babîyê xo de tay agahîyî daye.
Ayşe Gulere pare kerd ke babîyê ci hucreyê 3 kesan de maneno û hema zî tedawîya ci nêameyo kerdene û vat: “Babîyê mi nêeşkeno qisey bikero, bivîno û vîrê ci şino. Babîyê mi dêsî ra destek girewt wina ame pêvînayîşî û verî zî zîndanê Îskenderunî de Korona bibî.”
Siddik Gulerî pêvînayîş de kênaya xo rê vato ke o têna şino warê hewagirewtişî la nêeşkeno payan ser de vindero, neçare maneno ke bi xo gijikê xo biqesno.
Ayşe Gulere dîyar kerde ke babîyê ci hema nêeşkayo avûkatanê xo bivîno û venga pêro rayaumûmîye û rêxistinanê heqanê merdiman da ke wa derheqê babete de hîsger bibê. ÎZMÎR
