Çalakîya grevê vêşanîye ya temsîlkarîya HDPyî yê Hewlêrî Nasir Yagizî kewt roja 165. Rewşa weşîya Yagizî bîye giran û wedarîya Nêweşxane Jînî. La Yagizî ewja de tedawî red kerd
Rewşa weşîya Temsîlkarîya Partîya Demokratîke ya Şaran (HDP) yê Hewlêrî yê Başûrê Kurdistanî Nasir Yagizo ke 20ê Teşrîna Peyêna 2018î ra nata hemverê tecrîdê giranî yê serê Rayberê Şarê Kurdî Abdullah Ocalanî grevê vêşanîye yê bêdem û bêagêrayîşî de bi giran. Rewşa Yagizî vizêr saetanê şewe de giran bi û wedarîya Nêweşxaneyê Jînî. Badê kontrolê doktoran Yagizî tedawî red kerd û çalakîya xo domneno.
Yagizî 26ê Sibate de roja 98. yê grevî de zî rewşa weşîya ci giran bibî û wedarîyabî Nêweşxaneyê Parî, la badê kontrolan Yagizî tedawî red kerdbî û xoverdayîşê xo domnabi. Heman wextî de verî zî 1ê Çele yê 2019î de roja 73. yê grevî de wedarîyabî nêweşxane. La a game zî Yagizî badê kontrolan çalakîya xo domnabî.
Derheqê halê Yagizî de hemsereka Temsîlkarîya HDPyî ya Başûrê Kurdistanî Muzeyen Guneşe hayîdarî daye. Guneşe vist vîrî ke verê di rojan halê Yagizî giran bibi, la vizêr bişewe hîna giran bîyo û vat, “Naye ser ma o berd Nêweşxaneyê Jînî. Doktoran kontrolê ke lazim bîyî kerdî û rîyê bêtaqetî û zihîfbîyayîşê bedenê ê ra zerrîya ci rind nêdana piro.”
Guneşe da zanayene ke dejê beden û çimanê ê xeylî bîyê vêşî û heta tayê rojan nêeşkeno bivîno zî. Guneşe vat Yagizî tedawî red kerda û çalakîya xo domneno. HEWLÊR
