Endama Koordînasyonê KJKyî Rewşen Mêrdîne tewra bernameyê taybetî yê Stêrk TVyî bîye û cewab da persanê Zeynep Nergîz.
Qiseykerdişê Rewşen Mêrdîne ra tay qismê girîngî wina yê:
“Tecrîdê vera Rayber Apoyî sîyasî yo û nêno qebulkerdene. Ma do bi têkoşînê xo sîstemê Îmraliyî birijnê. Xeylêk reyî bi hawayêkê keyfî Rayberîye rê cezaya dîsîplînî dîyaye. Hînî fikr û îdeolojîya Rayberîye asta globale de zanîyenê û qebul benê. Sîstem zî ney ra terseno. CPTyo ke wezîfeyê ci wedaritişê tecrîdî yo, beno hemkarê sîstemê Îmraliyî.
Zîndanan de bi hezaran tepişteyê sîyasîyî est ê. Zîndanî bîyê warê xoverdayîşî. Sere de şarê kurdî rêxistinî, demokratîk, dezgeh û merdimê bînî ganî wayîrê tepişteyan vejîyê.
Gerîlayî hê Zap û Metîna de destanan nusenê, seba ke faşîzmî vindarnê şer kenê. Gerîlayî vera çekanê kîmyewîyan xo ver danê. Gerîlayî îrade û hêzê xo zî felsefeya Rayber Apoyî ra gênê. Dewletê NATOyî paştî danê hêrişanê dewleta tirke, benê hemkarê qirkerdişê şarê kurdî. PDK zî destpêkî ra nata bi hawayêkê aktîfî mîyanê nê şerî de cagêna. PDK vano qey PKK biqedo o ber beno la bi nê hawayî PDK binkewtişê xo awan keno. PDK xora do hesabê nê kerdişanê xo bido.
Ez tewirê cinîyanê Rojhelatê Kurdistanî û Îranî zerrî û canî ra fîraz kena. Ganî dewleta Îranî goş bida waştişanê cinî û şaran û sîstemê xo bivurna. Têgêrayîşê Azadîye yê Cinîyan paştî dana cinîyan ê çalakîkeran. Jin, Jiyan, Azadî felsefeya cuye ya. Cinîyê dinya wayîrê nê sloganî vejîyê. Nê çalakîyan ra dima rolê têgêrayîşê azadîya cinîyan zêdîyayê. Ganî cinîyî hîna zaf xo rêxistin bikerê, hetab serkewtişî têkoşînî rê dewam bikerê.
41 welatan ra 800 cinîyî tewrê Konferansê Cinîyan ê Mîyanneteweyî yê Berlînî bîyê. Cinîyî ancax eşkenê mîyanê sîstemêkê demokratîk, ekolojîk û azadîya cinîyan de xo îfade bikerê. Uca de cinîyanê dinya cinîyan ê kurdan rê sipas kerd. No zî mojneno ke cinîyê kurdî bîyê hêvîya dinya.
Çalakîyê 25ê Teşrîna Peyêne ganî asta vurnayîşê komelî de bê, bi armancê awankerdişê cuyêka azade û têdûşte bêrê serûberkerdene. Ganî vera qirkerdiş û faşîzmî ma çalakîyanê xo asta vurnayîşê komelî de bikerê, qirkerdişê cinîyan vindarnê. Ganî ma bi şîarê ‘Vera qirkerdiş û faşîzmî Jin, Jiyan, Azadî’ sîstemê serdestîya camêrdan, pederşahî, faşîst û dewletperestî bin bivisnê.” BEHDÎNAN
