Rêxistina Mafên Mirovan a Herêma Firatê bi daxuyaniyekê ragihand ku artêşa tirk a dagirker û çeteyên wê li dijî Bakur û Rojhilatê Sûriyeyê qirkirina komî, sûcên şer û sûcên li dijî mirovahiyê dikin. Rêxistinê ji rêxistinên navdewletî xwest ku komîteyeke lêpirsînê bi lezgînî bê herêmê, van sûcan tespît bike û radestî dadgehên navdewletî bike da ku berpirsyarên wan bên darizandin
Rêxistina Mafên Mirovan a Herêma Firatê bi boneya Roja Mafên Mirovan a Cîhanê, daxuyaniyek bi raya giştî re parve kir. Di daxuyaniyê de hejmareke endam û aktîvîstên Kobanê jî amade bûn. Daxuyanî ji hêla endama Rêxistina Mafên Mirovan a Herêma Firatê Nisrîn Elî ve hat xwendin.
Di daxuyaniyê de hat gotin ku binpêkirinên artêşa tirk a dagirker û çeteyên wê yên li Bakur û Rojhilatê Sûriyeyê di asta sûcên qirkirina komî, sûcên şer û sûcên li dijî mirovahiyê de ne. Elî diyar kir ku ev sûcên şer li Serêkaniyê û Girê Spî bi aşkerayî tên kirin. Daxuyanî wiha dom kir: “Qirkirina etnîkî tê kirin û bi bicihkirina tirkmen û sûriyeyên ji herêmên din, demografyaya herêmê tê guhertin. Zêdetirî 300 hezar şêniyên herêmê ji warên wan derxistin û vê jî karesateke mirovî bi xwe re anî. Her wiha zêdetirî 98 hezar koçberên ji herêmên cuda, li gelek kampên Bakur û Rojhilatê Sûriyeyê bi cih bûne.”
Banga ji bo rêxistinên navneteweyî
Daxuyanî wiha bi dawî bû: “Ji ber ku dewleta tirk û çeteyên wê nahêlin rêxistinên hiqûqê û ragihandinên serbixwe bikevin van herêman, binpêkirinên navborî tenê li gorî derfetên heyî hatine kirin. Zêdetirî hezar û 321 sivîl hatin qetilkirin û birîndarkirin. Her wiha di 2’yê kanûnê de ji di encama topbarana li dijî Til Rifatê de 8 jê zarok bi giştî 10 sivîlên efrînî hatin qetilkirin. Divê tevgereke navneteweyî ji bo rawestandina van komkujiyan bikevin nava tevgerê. Her wiha divê komîteya lêpirsînan a navneteweyî têkildarî van binpêkirinan lêpirsînan bide destpêkirin û berpirsyarên van sûcan pêşkêşî dozgeriya navneteweyî bike da ku bên darizandin.” KOBANÊ
