Rêxistina Edil û Tenmiye ya Lêkolînên Siyasî ji ber veguhestina komên çete ya ber bi Lîbyayê ji hêla dewleta tirk ve, Misr, Tunis û Cezayîr hişyar kir. Rêxistinê diyar kir ku armanca dewleta tirk vejandina serdema osmaniyan e û dixwaze Lîbyayê bike navenda terorîzmê
Rêxistina Edil û Tenmiyê (Wekhevî û Geşkirinê) ya Lêkolînên Siyasî ku rêxistineke Misrê ye, têkildarî hewldana dewleta tirk a ji bo çeteyan a ber bi Lîbyayê ve raporek amade kir. Di raporê de têkildarî destwerdana leşkerî ya dewleta tirk a ji bo Lîbyayê hişyarî hate kirin.
Rêxistinê di rapora xwe de destnîşan kir ku armanca dewleta tirk dixwaze ku komên terorê yên weke El Qaîde û DAIŞ’ê li Lîbyayê bi cih bike û bi vê yekê re jî li dijî dewletên weke Tunis, Misr û Cezayîrê êrîşên berfireh pêk bîne. Di raporê de rêxistinê diyar kir ku veguhestina rêxistinên terorî ya ji Iraq û Sûriyeyê ber bi Lîbyayê ve dê Lîbyayê vegerîne navendeke terorê.
Dixwazin serdema osmaniyan vejînin
Berdevkê rêxistinê Zîdan El Qenaî daxuyand ku Lîbya deriyê vegerandina serweriya Osmanî ya li dewletên bakurê Afrîkayê ye. Rêxistinê jî bang li dewletên Cezayîr, Tunis û Misrê kir ku hêzeke leşkerî ya hevkar ji bejahî, deryayî û asîmanî ava bikin ku rêxistinên terorî li hundirê xaka Lîbyayê têk bibin.
Herî dawî jî rêxistinê ev agahî dan: “Em dewletên navborî ji ber veguhestina bi hezaran çeteyan a ber bi Lîbyayê ve hişyar dikin. Dê ev hewldan bi xwe re gefekê mezin li ser ewlehiya dewletên cîran ên weke Tunis, Cezayîr û Misrê çê bike.”
