Stenbol, Îzmîr, Aydin, Mugla, Balikkesir, Adana û Anqara de êlîwîyî semedê heqanê xo vejîyayî kuçeyan çalakîyî kerdî. Îstanbul de hîrê çalakîyî ameyî kerdene. Înan ra yewe Îskeleyê Kadikoyî de ameye kerdene. Wekîlê HDPyî Musa Piroglu, SEP, TKH, Partîya EMEPî, TOP û Sendîkaya Kedkeranê Yewbîyayeyan zî tewrê ci bîyî.
Çalakîye de pankartê “Ma waştişê xo yê hemwelatîya seyyewbîne canêverdenê. Îbadetê ma Cem o, îbadetxaneyê ma Cemxane yî” û dovîzê “Ma qerarname nê heqê xo yê hemwelatîya seyyewbîne” wazenê ameyî kiriştene.
Serekê Komeleya Pîr Sultan Abdalî yê Kadikoyî Îbrahîm Karakayayî ke tîya qisey kerd waştişê hemwelatîya seyyewîne ard ziwan. Karakayayî vist vîrî ke do qanûnê torbayî roja sêşemeyî reyna bêro destgirewtene û vat: “Elewtîye meseleyêka pê nê qanûnî yena çareserkerdene nîya. Na meseleya girane ganî pê muxataban bêro çareserkerdene. Ma nê qanûn û qerarnameyî qebul nêkenê.”
Bi nameyê dezgehanê elewîyan eşkerayîye hetê Serekê Federasyonê Weqfanê Elewîyan Haydar Bakî Doganî ra ameye wendene. Eşkerayîye de ame vatene ke no qanûn elewîtîye sey leteyêkê kulturî binê tradîsyonê sunnî de ramojneno ke no vera bawerî û nasnameyê elewîyan heqeret o. Eşkerayîya hempare de ame vatene ke elewîyî do warê fermî û huqûqî de wayîrê heqanê xo bivejîyê.
Çalakîyanê bajaranê bînan de zî elewîyan reyna waştişê hemwelatîya seyyewbîne ard ziwan û mesajê xurtkerdişê têkoşînî dayî.
