Li Erdîşê, rezên tirî yên xwedî dîrokeke 3 hezar salî ne, li cîhanê di nav nebatên endemîk de cih digirin. Ev rezên tirî ku tenê li gundê Aksrafê ne, niha ji ber bêxwedîtî û bêavîtiyê hindik mane hişk bibin
Tiriyê Erdîşê ku di kitabeyekê de behsa wî tê kirin û tê gotin xwedî dîrokeke 3 hezar salî ye, niha ji ber polîtîkayên şaş hindik mane hişk bibin.
Li herêma ku nivîsa Qiralê Ûrartûyan Menûa lê heye ku dibêje, “Menûa ji bo Yezdan Xaldî ev rezê çandiye. Kî zirarê bide vî rezî wê Yezdan Xaldî, Yezdan Şîvînî û hemû yezdanên din wan di bin tavê de biqemirîne” êdî her diçe ev tirî hişk dibin. Berê ji vî tiriyî şerab û dims dihat çêkirin, lê belê ji ber her diçe hejmara baxên rez kêm dibin tenê li fêkîfiroşan tiriyê wê tê firotin.
Fîkrî Demîr (64) ku li gundê Aksrafê 37 sal in rezvaniyê dike, bilêv kir ku her diçe bax hişk dibin. Demîr, da zanîn ku pirsgirêka wan î mezin bêavîyî ye û got, ji bo vê wan gelek caran serî li Qeymeqamtiya Erdîşê daye lê belê serlêdana wan nehatiye bersivandin.
Demîr diyar kir ku ger kooperatîf an jî fabrîke bên çêkirin wê hejmara rezvanan zêde bibe û got: “Li gundên din jî ji ber bê avîtiyê rez hişk dibin.” Her wiha Demîr, şêniyên gund bi hev re cihokên avê çê kirine lê belê ev cihok têra wan nake û got, dewletê tu sozên xwe bi cih neaniye. WAN
