Riha bîyo merkezê hêrişanê Tirkîye yê vera vakur û rojhelatê Sûrîye. Goreyê xeberan Riha de vengê ambûlansan qet nêvindeno, merde û birîndaran benî û yenî
Hêrişê dewleta tirkî û çeteyanê girêdayeyê aye yê vera vakur û rojhelatê Sûrîye roja 7. de dewam keno. Qezaya Pirsûsî ya Riha ke tewr zêde hêrişî tede yenî hîskerdene de sewqîyatê leşkerî zêdîyayî. Ame zanayene ke 24 saetanê de Teyaregehê GAP yê Riha de helîkopterê ambûlansî vindenî.
Teyaregeh ra xeylê cenazeyî erşawîyenî
Ame dîyarkerdene ke helîkopterê ambûlansî teyaregeh ra werizenî û şonî qezayanê serê sînorî û birîndaran benî teyaregehî. Wesayîtê cenazeyan zî cenazeyan benî teyaregeh. Ame îdîakerdene ke helîkopterê ambûlansî teyaregehî ra xeylê cenazeyan berdî herêmenê cîya-cîyayan. Qismêko teyaregehî sivîlan rê ameyo padayene û tedbîrê îstisnayî ameyî girewtene. Destûr nîno dayene ke rayvanê ke şonî, yenî fotografan biancî.
Heta serê sibayî birîndaran berdî
Ame îdîakerdene ke saetanê şewe ra heta serê sibayî ambûlansî qezaya Kanîya Xezalan û Serêkanîyê ra birîndaran ardî Nêweşxaneyê Cigêrayîş û Perwerdeyî yê Mehmet Akîf Ersoyî û Nêweşxaneyê Cigêrayîş û Perwerdeyî yê Riha. Ambûlansê ke birîndaran berdî reyna tepîya agêrayî wirdî qezayan.
Şaredarîya Bajarê Girdî ya Riha seba leşkeran rayîr viraşte
Ame zanayene ke Şaredarîya Bajarê Girdî ya Riha xeylê wesayîtanê karî sewqê qezaya Pirsûsî ke cîranê Kobanî yo, kerde û seba leşkerê ke şonî rayîr viraşta.
Sewbîna ame zanayene ke polîsan hetê şaredarîye ra heta merkezê Riha û qezayanê ci Siwêreg, Xelfetî, Wêranşar, Bêrecûk û Cirnê Reşî beyreqe vilayê esnafan kerdî û aliqnayîşê beyreqan esnafan ser o ferz kerdî. RIHA
