Rêxistina Jinên Azad a Kurdistanê (RJAK) bi boneya salvegera koça dawî ya dayîka Rêberê Gelê Kurd Abdullah Ocalan Uveyş, peyamek belavkir.
RJAK’ê di peyama xwe de got; “Dayîka Uveyş bîrmendek ji bo gelê kurd bexşand ku karî li hemberî qirkirina gelê kurd şoreşê bike. Rêber Ocalan di têkoşîna dayîka Uveyş de, têkoşîna jinan zindî kir, rêya azadiyê nîşanî jinan kir. Di vê oxirê de jî bi hezaran jin berê xwe dan têkoşîna ji bo azadiyê. Dayîka Uveyş yekem dibistan bû ji bo rêberek ku îro ji bo gelên cîhanê bûye şanazî. Rêber Ocalan bi paradîgmaya nû nîşan da ku divê jin ji bo rizgariya xak, nîştiman û azadiyê pêşengtiyê bikin. Dîroka jinan bi jinan da nasîn.
Rêzdar Ocalan dibêje ‘Şoreşa Başûr Şoreşa Jinan e’, ji ber ku di kesayeta jinan de hemû civak tê qirkirin, xak tê dagirkirin. Ji ber ku jin û xak yek rêgezin û dema xak tê dagirkirin, destdirêjî li jinan tê kirin û jin qurbana sereke ya di şerên cîhanê dene.
Em bejna xwe li ber dayîka Uveyş ditewînin, hemû dayîkên şehîdan û jinên têkoşer, di salvegera koça dawî ya Uveyş de bi bîr tînîn. Ruhê wê şad be.”
