Bi boneya 8’emîn salvegera Komkujiya Roboskê, malbat û xizmên qurbaniyan reş girêdan û çûn goristanê
Îro 8’emîn salvegera Komkujiya Roboskê ye. Di komkujiyê de 19 jê zarok 34 welatî di encama êrîşa bi balafirên şer ên dewleta tirk de hatin qetilkirin.
Malbat û xizmên qurbaniyên Roboskê bi salane ji bo dîtina berpirsyarên komkujiyê û darizandina wan, têkoşîna edaletê didin. Malbat û xizmên qurbaniyan îro jî carek din reş li xwe girêdan û ji bo bîranîna qurbaniyan çûn Goristana Roboskê.
Tevî ku hewa sar û berf dibariya jî, şêniyên Roboskê wêneyên xizmên xwe hildan û ji nav gund heta goristanê meşiyan. Weke her sal, di bîranîna îsal de jî reş hat girêdan. Li ser goristanê rengê êş û awirên hêrsê xwe nîşan dide. Hin welatiyan nerazîbûn nîşanî nedîtina kujeran da û carek din daxwaza xwe ya edaletê anîn ziman.
Dayik û xizmên qurbaniyan ku xemgîn in çîrokên zarokên xwe vedibêjin.
Beriya bîranînê bi sedan leşker jî li gund hatibûn bicihkirin û di têketin û derketina gund de hatin sekinandin.
Bernameya bîranînê dê bi beşdariya hevseroka Kongreya Civaka Demokratîk (KCD) Leyla Guven, hevserokên Partiya Herêmên Demokratîk (DBP) Salîha Aydenîz û Keskîn Bayindir, hevserokê Partiya Demokratîk a Gelan (HDP) Sezaî Temellî, hevberdevka Kongreya Gelan a Demokratîk (HDK) Gulistan Kiliç Koçyîgît, parlamenterên HDP’ê û nûnerên rêxistinên civakî yên sivîl dê pêk were. ŞIRNEX
